Tàm dơ̆ lòt còp ngan ngồn lơgar Senegal, Củ tịc Quôk hội ồng Trần Thanh Mẫn neh tìp mat cribơyai broă mờ Kwang atbồ lơgar Senegal ồng Bassirou Diomaye Faye tàm Hìu lơh broă Kwang atbồ lơgar. Củ tịc Quôk hội đơs nền Việt Nam sền dờng màng bơtàu tơnguh bơta git gơp lơh broă bal uă gah mờ Senegal, kuơmàng là tàm ală gah lơh sa, kă bro phan, bơcri priă, broă lơh sa suơn sre, viễn thông mờ jak chài – măi mok.

Củ tịc Quôk hội pà git, uă tập đoàn dờng bơh lơgar Việt Nam dê gam sền gròi jòi tŭ niam bơcri priă tàm lơgar Senegal. Nàng kờñ dong kờl geh cồng nha broă lơh bal, Củ tịc Quôk hội sồr 2 gah mhar lơh sir tơngume adat boh lam, tềng đap mat là tơnguh mhar tàm bơyai ală jơnau hơ pơrgon bơh chờm bè Jơnau hơ pơrgon sền gàr dong kờl bơcri priă mờ Jơnau hơ pơrgon Pleh rề dia 2 dơ̆, lơh gơlik bơnàng jă adat boh lam kơ̆ kơljap ai mpồl lơh sa kă bro 2 lơgar in.