Càr Lâm Đồng mờ càr Gia Lai lơh ngan tơn jơh hìu ing, hìu ồm ñhăt dà mìu
Thứ năm, 08:03, 13/02/2025 Cau mblàng Ndong Brawl - K' Hạnh/VOV Tây Nguyên Cau mblàng Ndong Brawl - K' Hạnh/VOV Tây Nguyên
VOV4.K'Ho- Bơh bồ nam do, ală tiah tàm Tây Nguyên neh lơh jăt gùng dà broă lơh tơn jơh hìu ing, hìu ồm ñhăt dà mìu ai làng bol in. Jăt mờ hơ̆, càr Lâm Đồng neh lơh rơlao 1 rơbô nơm hìu, mờ càr Gia Lai lơh ngan lơh gơs di pơgăp 8 rơbô 500 nơm hìu tàm 6 nhai bồ nam do.

Mờ broă tus bal pràn kơl dang bơh ală mpồl lơh broă cíñ trị bal mờ broă tus bal bơh mpồl bơtiàn, càr Lâm Đồng neh lơh rơlao 1000 nơm hìu ing, hìu ồm ñhăt dà mìu tàm càr do, ndrờm mờ rơlao 50% khà broă rơndăp lơh geh ai. Ală ngai bồ nam pa 2025 do, hìu lŏ Ka Uyên, kòn cau K’ Ho, kis tàm thôn 3, sàh Đinh Trang Thượng, kơnhoàl Di Linh, càr Lâm Đồng chờ hờp ngan tŭ geh mŭt ơm kis tàm hìu pa geh lơh kơl jăp, ala hìu ồm sèt.

Tơngai do, rơlao 1000 hìu rơƀah, hìu pa lik klàs rơƀah geh hìu ơm gơtìp sèt, hìu ồm ñhăt dà mìu tàm càr Lâm Đồng neh geh dong kờl priă lơh pa mờ lơh niam wơl, tàm hơ̆ geh 860 nơm hìu geh lơh pa mờ 178 nơm hìu lơh niam wơl, mờ kờp jơh priă lơh rơlao 47 tơmàn đong. Mờ priă do geh tă bơh “Kes priă tài cau rơƀah” geh Anih duh broă Mặt trận Dà lơgar Việt Nam càr Lâm Đồng dờp bơh ală mpồl lơh broă, cau dùl nă să, mpồl lơh sa kă bro tàm càr tă pơgồp bal.

Mpồl sồr lơh lam lơh tơn jơh hìu lơh ing, hìu sèt ñhăt dà mìu càr Gia Lai ai jơnau kờñ rơ̆p lơh sir broă tơn jơh 8 rơbiii 485 nơm hìu lơh ing, hìu sèt ñhăt dà mìu tàm 6 nhai bồ nam 2025. Jơh gùt càr Gia Lai geh 8 rơbô 485 hìu bơnhă kờñ dong kờl bè hìu ơm, tàm hơ̆ kờñ lơh pa 6 rơbô 828 nơm hìu mờ lơh niam wơl 1 rơbô 657 nơm hìu mờ kờp jơh khà priă kờp dŭ lài 460 tơmàn đong. Tàm hơ̆, priă bơh Dà lơgar dong kờl 241 tơmàn đong.

Tŭ do ală tiah tàm càr Gia Lai tơrgùm ai lơh lài dong kờl cau geh màng mờ Dà lơgar mờ hìu bơnhă rƀah in, mơkung hòi jà tă pơgồp tai priă jền bơh mpồl bơtiàn mờ mpồl ling phàu crong nàng gàr niam khà dong kờl lơh hìu. Ồng Hồ Văn Niên, Ƀí thư Tỉñ ủy càr Gia Lai sồr ală tiah sền gĭt loh tơl bơnah broă, tơngai geh ngan mut lơh nàng lơh sir di tŭ tơngai broă tơn jơh hìu lơh ing, tơngŏ nùs nhơm lơh ngan cíñ trị bơh càr dê tàm broă dong làng bol bơtàu tơnguh ală bơta tàm rài kis dê.

Cau mblàng Ndong Brawl - K' Hạnh/VOV Tây Nguyên

Viết bình luận

TIN CÙNG CHUYÊN MỤC