
Geh kwang bàng, cau ling Pôs đồng ling sền gàr tiah nhàr lơgar Đăk Long mờ kwang đơng lam bồ Gah đơng lam Mpồl ling sền gàr tiah nhàr lơgar càr Kon Tum pà phan, pờ mpồng jàu hìu ơm pa, ồng A Trỏ, kòn cau Jeh- Triêng, ơm tàm ƀòn Dục Lang, sàh Đăk Long, kơnhoàl Đăk Glei kwi kwơ jơh jơng tê. Ồng Trỏ pà gĭt, nam do neh 84 sơnam rao, ờ geh tŭ lơi khin kơlôi tus lồi rài kis den geh kis tàm hìu ơm rơng đàih, ơnàng niam bè do:“Hìu yau añ dê trồ mìu den ñhăt dà mìu, càl den lơnggơh. Hìu pa geh Dà lơgar dong kờl 60 tơlak đong, den bàr pe nă sau ling sền gàr tiah nhàr lơgar Pôs đồng Đăk Long tờ bơnàng hìu, lơh kơlik hìu, ai kra in sơmang tai mờ lơh ờ ai priă ai kra in tai. Pa lơh rlau 1 nhai mờ neh lơh sir bè do. Mìng gĭt ưn ngài ală sau ling sền gàr tiah nhàr lơgar lơm”.

Sàh tiah nhàr lơgar Đăk Long, kơnhoàl Đăk Glei, càr Kon Tum geh gùng nhàr lơgar Dà lơgar jòng rlau 53 kơi sồ rềp nhàr bal mờ lơgar Lào. Sàh geh 2 Pôs đồng ling sền gàr tiah nhàr lơgar là Đăk Long mờ Rơ Long. Lơh jat jơnau sồr bơh Tỉñ ủy càr Kon Tum dê lơh tơn jơh hìu lơh ing, hìu sèt ñhăt dà mìu ai hìu bơnhă làng bol in, 2 pôs đồng pơgồp bal mờ Đảng ủy, gơnoar atbồ sàh Đăk Long lòt sền tơl thôn, sền gĭt geh 24 hìu bơnhă làng bol kờñ geh lơh tơn jơh hìu lơh ing, hìu sèt ñhăt dà mìu. Ồng A Thai, Ƀí thư Đảng ủy sàh Đăk Long pà gĭt, mờ bơta dong kờl bơh kwang bàng, cau ling sền gàr tiah nhàr lơgar dê tus ngai 1/03 sàh neh lam lơh geh 18 nơm hìu mờ pơn đơl pràn lơh ngan lài mờ ngai 30/04 rơ̆p lơh sir jơh lơm: “Đảng uỷ pơgồp bal mờ mpồl ling Pôs đồng lơh tàm ù tiah do dê lơh jat dùl nùs bal cau lơi geh bơta lơi dong kờl bơta hơ̆. Is ồn ling sền gàr tiah nhàr lơgar oh mi dong ngai lơh broă uă ngan. Bơdìh mờ ngai lơh broă pôs đồng kung hòi jà kwang bàng, cau ling dong kờl mờ phan bơna hơ̆ là pơgồp bal mờ priă mat dong kờl làng bol nàng lơh ai làng bol jơi bơtiàn dồ ết nă cau in brồ guh lik klàs rƀah kơ̆ kơl jăp”.
Thượng tá Đặng Nguyên Hương, Ƀí thư Đảng uỷ, Cíñ trị viên Pôs đồng ling sền gàr tiah nhàr lơgar Đăk Long, sàh Đăk Long, kơnhoàl Đăk Glei, pà gĭt:“Lơh jat broă lơh tơn jơh hìu lơh ing, hìu sèt ñhăt dà mìu tàm ù tiah do dê bol añ geh Jơnau lơh nền tàm pơrjum, broă rơndăp lơh bơyai lam lơh tàm jơh gùt kwang bàng, cau ling tus bal broă lơh do. Bol añ pơgồp bal niam mờ kấp ủy, gơnoar atbồ sàh Đăk Long ai kwang bàng, cau ling tus bal tơn tờ bơnàng hìu, jun pơndiang phan bơna nàng bơt bơtàu. Bơdìh hơ̆ bol añ dong kờl sơmang hòi jà ală cau geh nùs nhơm niam tă pơgồp dong kờl bal”.
Lòt bal mờ kấp ủy, gơnoar atbồ 13 sàh tiah nhàr lơgar gơwèt 4 kơnhoàl: Đăk Glei, Ngọc Hồi, Sa Thầy mờ Ia H’Drai, kwang bàng, cau ling ală pôs đồng ling sền gàr tiah nhàr lơgar càr Kon Tum gam hời rơ hời tàm sơm bat tê bal, pơgồp bal dà kơl hề dong làng bol lơh tơn jơh hìu lơh ing, hìu sèt ñhăt dà mìu.

Đại tá Lê Minh Chính, Ƀí thư Đảng uỷ, Cíñ uỷ Mpồl ling sền gàr tiah nhàr lơgar càr Kon Tum, pà gĭt, jat kềng gah gùng tiah nhàr lơgar jòng rlau 292 kơi sồ rềp nhàr bal mờ lơgar Lào mờ Campuchia geh 199 nơm hìu bơh làng bol dê tàm bơta hìu lơh ing, hìu sèt ñhăt dà mìu mờ ală hìu kờñ lơh pa jơh lơm là 145 nơm. Ờ mìng tă pơgồp dà kơl hề bal mờ gơnoar atbồ tiah do in gờñ lơh sir jơnau sồr lơh tơn jơh hìu lơh ing, hìu sèt ñhăt dà mìu, kwang bàng, cau ling sền gàr tiah nhàr lơgar gam jơh nùs lơh ngan dong ală hìu bơnhă làng bol lơh geh ală hìu ơm mờ kờp priă uă rlau mờ khà priă Dà lơgar dê dong kờl. Đại tá Lê Minh Chính, đơs: “Bơdìh mờ 60 tơlak đong bơh hơđang dê bol añ hòi jà tă pơgồp bal bơh kwang bàng, cau ling mpồl ling sền gàr tiah nhàr lơgar càr Kon Tum, ală mpồl lơh sa kă bro, ală cau geh nùs nhơm niam tă pơgồp bal lơh bè lơi tơl nơm hìu geh priă lơh bơh 85 tus 90 tơlak đong rlau hơđang. Hìu ơm là dùl broă lơh bơt bơtàu geh gơtha ngan ngồn gơwèt mờ rài kis bơh làng bol dê nàng làng bol in geh dùl nơm hìu ơm ngan ngồn gàr niam bè bơta kơnhăp, bơta kơ̆, niam mờ kơ̆ kơl jăp jŏ jòng ai làng bol in”.
Mờ bơta sơm bat tê bal, pơgồp bal dà kơl hề bơh kwang bàng, cau ling sền gàr tiah nhàr lơgar tơngai lơh pa, lơh niam wơl 199 nơm hìu lơh ing, hìu sèt ñhăt dà mìu tàm 13 sàh tiah nhàr lơgar bơh càr Kon Tum dê gam geh lơh mhar. Tàm hơ̆, uă sàh neh ai jơnau kờñ bè lơh sir broă lơh tơn jơh hìu lơh ing, hìu sèt ñhăt dà mìu ai làng bol in lài mờ ngai 30/04 di tŭ gờm chờ tơngkah kir sơnrai 50 nam Ngai tơnggơs klàs tiah đah Jum tơrgùm dùl Dà lơgar. Tus jơh nhai 2 pa do, càr Kon Tum neh lơh sir 879 nơm hìu tàm kờp jơh khà 2 rơbô 752 nơm hìu lơh ing, hìu sèt ñhăt dà mìu kờñ geh lơh pa mờ lơh niam wơl.
Viết bình luận