Jơh gùt càr Dăk Nông tŭ do gam rlau 6 rbô hìu gam ơm kis tàm ală hìu ing, hìu ồm sèt ñhăt dà mìu. Tàm khà hơ̆, geh pơgăp 1 rbô 700 hìu tơl bơta geh dờp bơta dong kờl hìu ơm bơh ală broă lơh jơnau kờñ dà lơgar, broă lơh dong kờl bơh Dà lơgar dê.

Lơh jăt Broă lơh hòi jà tơn jơh hìu ing, hìu ồm sèt ñhăt dà mìu bơh Thủ tướng Cíñ phủ dê, càr Dăk Nông geh 540 hìu geh dong kờl, mờ kờp jơh priă tă lơh rlau 40 tơmàn đong. Tỉñ ủy càr, Anih duh broă Làng bol càr Dăk Nông neh mhar lam lơh broă lơh kờp sền nền, lơh sră cih măt mờ sền swì ring bal ală hìu làng bol geh dờp bơta dong kờl, mơkung jàu ală sờh, gah, tiah in lơh sir ală sră nggal nàng sơnđờm lơh hìu ơm ai ală hìu làng bol in. Lơyài ngan là lồi nhai 02 nam 2025, càr Dăk Nông rơ̆p sơnđờm lơh pa 113 nơm hìu ơm, geh tus pơgăp 21% khà geh sền swì ring bal. Càr Dăk Nông jơh nùs lơh ngan, tus lài nhai 09 nam 2025 lơh sir 540 nơm hìu ơm, hơ̆ là pah ngai càr rơ̆p tơn jơh pơgăp 2 nơm hìu ing, hìu ồm sèt ñhăt dà mìu.