Dăk Nông sơnđờm mut lơh mờ lam lơh tơn jơh hìu lơh ing
Thứ sáu, 11:00, 07/03/2025 Cau mblàng K’Hạnh/VOV Tây Nguyên Cau mblàng K’Hạnh/VOV Tây Nguyên
VOV4.K’Ho- Lơh jat srơh tàm pơrlòng jơh gùt lơgar tàm sơm bat tê bal “Tơn jơh hìu lơh ing, hìu sèt ñhăt dà mìu” ngai 6/03, tàm sàh tiah nhàr lơgar Thuận An, kơnhoàl Dăk Mil, Mpồl Sồr lơh tơn jơh hìu lơh ing, hìu sèt ñhăt dà mìu càr Dăk Nông bơyai lơh dơ̆ sơnđờm mut lơh mờ lam lơh srơh tàm ù tiah jơh gùt càr dê.

Tàm dơ̆ sơnđờm mut lơh mờ lam lơh, Mpồl Sồr lơh tơn jơh hìu lơh ing, hìu sèt ñhăt dà mìu càr Dăk Nông neh jàu khà priă 300 tơlak đong dong kơl 5 hìu bơnhă tàm sàh tiah nhàr lơgar Thuận An in nàng lơh hìu pa kơ̆ kơl jăp. Bal mờ dong kờl priă jền, ală kấp gơnoar atbồ tiah do, ală mpồl ling phàu crong tàm tiah do dê kung rơ̆p dong kờl phan bơna mờ cau lơh broă nàng dong ală hìu bơnhă in gờñ lơh sir hìu ơm pa.

Bơh priă ală broă lơh, broă lơh dong kờl mờ mpồl bơtiàn lơh bal, bơh nam 2020 tus tŭ do, càr Dăk Nông neh lơh pa geh rlau 1 rơbô 200 nơm hìu ai ală hìu bơnhă geh rài kis kal ke in. Jơh gùt càr tŭ do gam geh rlau 6 rơbô nơm hìu lơh ing, hìu sèt ñhăt dà mìu. Tàm hơ̆ geh mờr 1 rơbô 800 nơm hìu geh tơl ală bơta nàng lam lơh jat dong kờl hìu ơm bơh ală broă lơh, broă dong kờl bơh Dà lơgar dê. Dơ̆ do, càr Dăk Nông geh 540 hìu bơnhă geh dong kờl lơh hìu pa jat Broă lơh lam lơh tơn jơh hìu lơh ing, hìu sèt ñhăt dà mìu bơh Thủ tướng Cíñ phủ dê lam lơh mờ kờp jơh khà priă Dà lơgar dê dong kờl là 40 tơmàn đong.

Cau mblàng K’Hạnh/VOV Tây Nguyên

Viết bình luận

TIN CÙNG CHUYÊN MỤC