Lơh jat Nhai lơh broă tài kơnòm dềt nam 2025 mờ tơngume “Ai lài bơta pràn lơh sir ală jơnau kờñ tài kơnòm dềt”, ală gah broă geh gơnoar tàm ù tiah càr Gia Lai dê jơh nùs lam lơh uă broă lơh geh ngan, mờ nùs nhơm lơh ngan cèng tus ai kơnòm dềt in, is ồn là kơnòm dềt tàm tiah sar lơgar ngài, kơnòm dềt tiah jơi bơtiàn dồ ết nă cau mờ ală kơnòm dềt geh rài kis kal ke uă geh dùl tiah ơm kis lơngăp lơngai, niam mờ ring bal. Kàl rơlô bơkàng nam 2025 tàm Gia Lai, ală gah broă geh gơnoar is ồn sền gròi tus broă pơndờm pơnđiang jơh bal mờ phan bơna mờ nùs nhơm gơwèt mờ ală kơnòm bơsram rƀah, kơnòm bơsram jơi bơtiàn dồ ết nă cau nàng ală kơnòm dềt in pơn jat tai cơn đoà kơ̆ tàm gùng lòt bơsram sră.

Càr Gia Lai tŭ do geh mờr 5 rơbô nă kơnòm bơsram gơwèt rài kis kal ke uă mờ rlau 95 rơbô nă kơnòm dềt geh pơhìn gơ ơm tàm rài kis ndrờm bè hơ̆ sơl. Mờ bơta tàm sơm bat tê bal, dồ nùs bal bơh gơnoar atbồ, ală mpồl cau, mpồl lơh sa kă bro mờ mpồl bơtiàn dê, ală “kơnòm dềt” bơh càr dê gam geh dong kờl nàng bơtàu tơnguh tơl làm.