Jăt Ƀộ Bơ̆t bơtàu, jơh gùt lơgar geh 686 rơndăp broă lơh hìu ơm mpồl bơtiàn gam lam lơh bal mờ 623 rbô nơm, tàm hơ̆ 117 rơndăp broă lơh neh lơh gơs. Is ồn 5 nhai bồ nam do, neh lơh gơs rlau 22 rbô 600 nơm mờ sơnđờm lơh tai 21 rơndăp broă lơh pa. Thủ tướng Cíñ phủ đơs nền, bơtàu tơngguh hìu ơm mpồl bơtiàn là broă lơh dong kờl sền gàr lơngăp lơngai rài kis kờñ ngan pal geh, gàr niam gơnoar geh anih ơm ai làng bol in, ngan là cau lơbơn ñam ño, cau ờ pràn. Thủ tướng jờng rơ lơh ngan ală ƀòn lơgar dê, mơkung ai gĭt loh kung gam sơl uă gơkòl kờñ pal tă bơsong.

Jơnau kờñ tus nam 2030 lơh gơs 1 tơlak nơm hìu mpồl bơtiàn, is ồn nam 2025 là 100 rbô nơm. Thủ tướng sồr ală kâp đơng lam, ngan là cau lam bồ, pal sền gròi dipal, kờp sền nền wơl broă dong kờl geh càn priă, ù tiah, lơh sră pơ àr gơnoar ătbồ nàng ai tơl bơta ƀươn ngan rlau jơh ai làng bol mờ mpồl lơh sa kă bro in.