Tàm càr Dăk Lăk, sră ƀăo kăc màng neh gờñ lơh gơs bơtàu tơngguh bơh ală nam 1930 rài lài dê. Tàm hìu jàm Buôn Ma Thuột geh ală pang ƀăo “Yoan- Rơđê”, “Che sreng căp”, “Căp mờ che sreng lòs” bơh ală ồng Phan Đăng Lưu, Hồ Tùng Mậu dê lơh bơnàng jă mờs ă tờm tơn cih jơnau…Ală pang ƀăo cih tê 4 pang dờng kàr mpàng tê nàng ƀươn tàm dờp mờ kung gam gàr geh sơl ndơ̆p ndơr, neh bơto bơtê nùs nhơm kăc màng ai cau jàm in. Ngai 01/05/1975, Anih Pờ tơlik jơnau đơs Dăk Lăk (anih bơh sơnrờp Anih Pờ tơlik jơnau đơs mờ Sơñio rùp Dăk Lăk dê) sơnđờm pờ tơlik jơnau đơs. Ngai 15/01/1976, Anih cih Ƀăo Dăk Lăk geh tơnggơs, tơlik măt cau sền pang ƀăo bơh sơnrờp di tàm dơ̆ Sa tềp Ƀíñ Thìn. Bal mờ bơta bơtàu tơngguh bal bơh jơh gùt lơgar dê, sră ƀăo càr Dăk Lăk neh geh ală bơta bơtàu tơngguh kơ̆ kơl jăp. Tŭ do geh 54 anih lơh sră ƀăo gam lơh broă tàm ù tiah càr dê.

Tàm pơrjum cribơyai, ală cau ala măt tơm bơh bơr bal bè ală bơta lòng gơ tơlik tàm tŭ tơngai pa, dan geh ală broă lơh bơ̆t bơtàu mpồl cau lơh ƀăo lơh geh jơnau sồr bơtàu tơngguh. Jăt cau lơh ƀăo mò Đàm Thị Thuần, Phó Lam bồ dờng Mpồl sền swì Ƀăo Dăk Lăk, sồr ngai sơlơ uă bè tam gơl sồ, cau lơh ƀăo pal gàr kơ̆ nùs nhơm kăc màng, nùs nhơm broă lơh. Mò Đàm Thị Thuần, đơs: “Tŭ do AI geh uă ngan phan ngui, phan ngui tàm măy tíñ den tàng lơh ƀăo tŭ do bơdìh mờ broă lòt ngan ngồn den bol he gơtùi ngui uă ngan ală phan ngui AI dê nàng dong kờl sền swì wơl dipal jơnau yal. Bal mờ ală jơnau đơs, bơta sền sơnơng, muh măt sền gŏ cíñ trị cau lơh ƀăo dê, mờ bơta ngan ngồn sră ƀăo dê, is ồn là kơnòl broă cau lơh ƀăo sră ƀăo kăc màng dê. Ngui internet mpồl bơtiàn mờ ai gơ gơgơs phan ngui dong kờl, gơgơs dùl anih nàng jun yal, yal tơngĭt mblàng yal ai sră ƀăo in”.

Ală cau ala măt kung ring bal là gơ wèt mờ ù tiah krơi is bè Dăk Lăk, broă yal tơnggĭt jơnau dipal, di tŭ, geh kwơ ngan tus mờ làng bol in, is ồn là làng bol tàm tiah sar, tiah ngài, tiah jơi bơtiàn dùl êt nă cau, ờ mìng là kơnòl broă kwơmàng mờ gam là kơnòl cíñ trị, nùs nhơm cau lơh ƀăo dê. Sră ƀăo kăc màng mờ gơnoar broă là mpồl cau lơh kòn gùng đah Đảng, Dà lơgar mờ Làng bol, pal pơn jăt tai lơh jăt kơnòl broă drơng broă, lơh gơrề jơnau sồr, gùng dà broă lơh tus mờ tơl ală rơnàng cau tàm mpồl bơtiàn, pơgồp bơnah gàr niam gơnoar geh gĭt jơnau yal bơh làng bol dê, tơrmù ờ ờ ndrờm bal jơnau yal tơnggĭt, tơngguh uă bồ tơngoh gĭt wă làng bol dê, gàr kơ̆ mpồl tam klăc dờng jơh gùt jơi bơtiàn.

Ồng Trần Hồng Tiến, Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk pà gĭt, ală jơnau yal tàm pơrjum cribơyai rơ̆p pơgồp bơnah tàm broă bơ̆t bơtàu mpồl cau lơh sră ƀăo lơh geh jơnau sồr kơnòl broă pa.

“Ală jơnau đơs tă pơgồp dipal ngan, rềp mờ bơta geh ngan ƀòn lơgar dê. Ală anih lơh broă ătbồ dà lơgar, ală kâp, ală gah tơnơ̆ tŭ iăt kơno ală jơnau đơs, jơnau dan, jơnau sồr hơ̆ den geh ală pơlam gùng, jơnau sồr, tă pơgồp jơnau đơs nàng lơh gơlik ală gơn kơnờm dong ai ală anih lơh broă sră ƀăo, mpồl cau cih jơnau in lơh broă niam rlau, drơng niam rlau kơnòl broă cíñ trị ƀòn lơgar dê".