Càr Gia Lai lơh glài nền nòn broă kă bro phan ờ ngan
Thứ năm, 09:21, 19/06/2025 Cau mblàng Ndong Brawl/Cau cih Hoàng Qui (VOV Tây Nguyên) Cau mblàng Ndong Brawl/Cau cih Hoàng Qui (VOV Tây Nguyên)
VOV4.K'Ho- Càr Gia Lai gam lơh jăt dơ̆ lik lơh broă nàng sền mờ lơh glài ală broă kă bro phan blơ̆ blăc, pơrlồm kă bro, phan ờ ngan mờ tìs mờ gơnoar ngui bơta ngăc ngar. Dơ̆ lik lơh broă uă neh pơgồp bal bơnah broă lơh niam drà kă bro, sền gàr gơnoar kwơ cau ngui sa mờ tơnguh uă cồng nha atbồ dà lơgar.

Tàm siêu thị Co.opMart Pleiku, càr Gia Lai, nùs nhơm blơi phan geh bơyai lơh gal ngan. Ală hìu ràng tăc phan geh rơndăp niam, kloh mờ tơl ală bơta phan bơh phan sa, phan nhơl tus mờ ală bơta phan kwơ màng ndai. Tơl bơta phan ndrờm geh sền nền nòn lài mờ tŭ ơn tềng dra, gàr niam phan geh lơh, anih lơh gơs loh làng.

Mò Châu Hoàng Thy, Phó Kwang lam bồ siệu thị Co.opMart Pleiku pà git: “Tàm siêu thị phan kă bro uă bơta mờ uă ngan, ală bơta phan bơh ală cau lơh gơs geh nùs nhơm pin dờn geh sră dờp ISO 9000, ală bơta phan pin dờn geh bơta bơkah. Bol añ sùm ơm đah cau ngui sa, bè atbồ bơta bơkah phan kă bro tŭ blơi tus mờ tŭ ràng tăc, sền gàr phan kă bro tàm hìu tăc ơn tềng dra sùm niam, bañ lời gơtìp phan bơcah, ờ niam, lơh broă bal mờ cau lơh gơs phan geh sră dờp geh anih lơh broă Dà lơgar ai”.

Ờ mìng tàm ală siêu thị dờng, broă gàr niam phan kă bro kung geh ală cau kă bro tàm ƀòn lơgar sền kwơ. Lŏ Trần Kim Huế, cau tờm hìu tăc phan Sơn Huế tàm ƀòn drà dềt Chư Ty, kơnhoàl Đức Cơ, tơlik nùs nhơm kơ̆p kờñ mpồl lơh broă geh gơnoar pal sền gròi nền nòn rơlao ală gah tăc phan tàm internet mờ phan kă bro bơh nhàr lơgar nàng sền gàr cau kă bro di mờ adăt boh lam. “Añ tăc ală bơta phan kông ty jào, geh sră nggal sền gàr kloh niam phan sa, sră dờp kloh niam phan sa den añ pa tơmŭt. Phan ờ git anih lơh gơs den añ kung ờ tơmŭt tài làng bol tŭ do lòt blơi phan kung ngăc ngar, di lah lòt blơi mờ ờ gŏ anih lơh, ờ gŏ sră lir loh làng den cau ờ blơi”.

Tàm tơngai pờ lơh dơ̆ lik lơh broă uă bơh ngai 15 nhai 5 tus ngai 15 nhai 6, mpồl lơh broă geh gơnoar càr Gia Lai neh gŏ di pơgăp 90 dơ̆ tìs, lơh glài mờ priă kờp rơlao 1 tơmàn 700 tơlăk đong. Pal kah ngan, Kwang àng càr neh gŏ mờ yă 2 dơ̆ kă bro, lơh kơphe ờ ngan. Dùl dơ̆ gơrềng tus mờ phơng sih bal mờ phan lơh broă sa suơn sre kung gam pơn jăt tai lùp sền nàng lơh glài nền nòn. Ồng Lê Hồng Hà, Atbồ Ci kụk Atbồ drà kă bro càr Gia Lai pà git: “Tàm tơngu me đơng lam bơh Thủ tướng Cíñ phủ bè broă pờ lơh dơ̆ lik lơh broă uă di tàm dơ̆ do ală tơngu me tờm gơrềng tus phan kă bro làng bol ngui, hơ̆ là phan sa đơs bal mờ phan lơh tơn pràn să, sơnơm ờ ngan gam tăc tàm drà kă bro. Mpồl sồr lơh bal mờ mpồl lơh broă is ồn càr Gia Lai tơrgùm tàm ală gah broă lơh hơ̆. Bơdìh hơ̆ tai, càr kung sồr tơrgùm tàm ală gah broă krơi is bè xăng jờu, phơng sih, phan lơh broă sa suơn sre nàng kơrian mờ sền gàr gơnoar kwơ di mờ adăt boh lam ai làng bol bal mờ mpồl lơh sa kă bro tàm càr in”.

Ờ mìng ơm wơl tàm gah broă kă bro phan, gah lơh sơnơm càr Gia Lai kung lơh broă pràn tàm broă sền, lơh glài tìs. Sờh Lơh sơnơm càr Gia Lai neh lơh geh 2 mpồl sền krơi is bè broă kă bro sơnơm, phan bơka să mờ kloh niam phan sa. Bơh broă tus sền tàm ală tiah bè ƀòn dờng Pleiku, kơnhoàl Đức Cơ, Ia Pa mờ ƀòn drà dờng Ayun Pa neh gŏ 5 hìu gơtìp tìs. Ală tìs mìng geh, tàm hơ̆ geh bal tàm broă ờ lơh jăt broă yal is phan geh lơh, gàr ờ di mờ bơta geh cih tềng kơl dung, mờ ờ gŏ anih prăp gàr. Mò Ksor Hiền, Phó Kwang lam bồ Sờh Lơh sơnơm càr Gia Lai đơs nền: “Tàm tơngai tus Sờh do rơ̆p pơn jăt tai geh sùm broă lơh nàng gàr bơta niam sơnơm, phan bơka să mờ phan sa ai làng bol kis tàm càr in. Mờ broă lơh ngan ờ geh tiah kơrian, bơsong di jăt bơta mờ khà geh, sùm geh tàm mpồl lòt sền lơh geh lùp sền, atbồ drà kă bro, kwang àng tàm mpồl den ală cồng nha lòt sền ndrờm geh yal mờ kâp geh gơnoar in nàng lơh glài di tŭ”.

Ală broă lơh ngan ndrờm bal bơh ală kấp, gah lơh broă tàm càr Gia Lai dê neh pơgồp bal tàm broă tơnguh uă jơnau git wă bơh làng bol, mpồl lơh sa kă bro tàm broă lơh jăt adăt boh lam, mờ lơh geh tiah kă bro niam bơnĕ, geh sùm mờ loh làng.

 

Cau mblàng Ndong Brawl/Cau cih Hoàng Qui (VOV Tây Nguyên)

Viết bình luận

TIN CÙNG CHUYÊN MỤC