Tŭ mat tơngai gam geh dồ ềt ală bơta àng sơn rờp gờm chờ ngai pa, tuh ală tơngai dồ ết tềng hơ đang trồ tơlir tàm bơta măt dà lềng tơlir niam, sàng ngan, sền gŏ tơn ală san hô tàm dà lềng, ală cau ling neh mhar ngan rào goh să jan mờ lời dùl bơnah dà do nàng tuh tờm chi, mờ biăp in. Ală nam pa do, bồt geh bơcri priă blơi ală sơntèk dà den tàng neh rcang gàr tơl geh 100% jơnau kờñ ngui dà pah ngai. Trung sĩ Thái Phương Nam gam lơh broă tàm bồt Đá Thị đơs: “Pơgồp dà kơl hề tàm suơn biăp, suơn chi mờ gŏ geh cồng nha bơh he dê tơlir niam, geh suơn biăp drơng rài kis den he gơ lơh chờ hờp ngan”.

Tàm bồt Đá Thị geh sươn bơkao dềt niam ngan tam uă ngan là bơkào giấy, bơkào mẫu đơn nha dềt mờ bơkào sứ. Ală cau ling lơh tơn mpồng mut “Bồt Đá Thị” mờ gĭt nđờ pơgàr chi bơh ală cau ling dê mòn, lơh gŏ tŭ ru. Sươn bơkào bơh bồt Đá Thị is ồn ngan tài bơh gơtùi “trờn” jat tŭ tơngai, gùng càl khồm. Thượng uý Mai Vũ Thanh Nguyên, Đơng lam bồ bồt Đá Thị, pà gĭt: “Càl khồm đah Tô mat tơngai lik den bol añ ơn suơn bơkào tềng đah do nàng pleh càl khồm. Nhai 5 tam gơl càl khồm kàl đah Jum mat tơngai mut bơh đah đơm do guh den bol añ rơ̆p ntrờn suơn bơkào tus đah ne nàng pleh càl khồm, gàr niam lơngăp lơngai ai tờm chi in”.

Tàm gùl dà lềng dờng ơning ơnàng, ƀô boh hang ngan tàm tơl dơ̆ càl khồm, nhơm dà, nhơm tă, mơya cơnđoà jơng tus khat dùl bồt lơi, bulah bồt pơr dồng, bồt dềt tàm dà halà hìu dra DK1 - 19, ală mpồl lơh broă kung ndrờm ngoh rơngăc sền ală suơn biăp tơlir niam ngan, thùng xốp ơn niam mờ biăp tơlir pa hòn niam ngan. Geh tŭ tàm do, nha biăp brong, biăp mồng tơi ndrờm dờng rlau mờ tiah tềng hơđang ù gờl. Kàl prang tàm bồt jŏ jòng, tus nhai 8 nhai 9 hơ̆ sồng sơnđờm geh mìu, ală cau ling tờ bơtô tơ̆p ală sơntèk đù nàng dơng dà mìu, ngui bal mờ dà ngui pah ngai nàng tuh dà ai biăp in. Pròc ka mờ dà tuh hữu kơ geh tơ̆p bồr di broă lơh jak chài nàng gơ gơs phơng sih ai biăp in. Mìng mờ 78 thơk vuông ù tam biăp tàm bồt dềt Cô Lin, ală cau ling neh tơnhào geh rlau 700 kĭ biăp dùl nam, gàr geh niam ngan biăp ai dơ̆ sa sào bơh mpồl ling dê. Đại uý Nguyễn Xuân Hoàng, Cíñ trị viên bồt Cô Lin pà gĭt, ală sơntèk dơng dà tàm dơlam geh rơndăp tăp sèng bal sùm bơh đah bơdìh mut tàm suơn. Dà bơh broă lơh gơkram boh rơ̆p geh tuh tàm tờm chi nàng gàr niam bơta sù iò: “Pah ngai bơdìh mờ jiơ lơh broă tờm bơh mpồl ling dê, oh mi lam tam biăp tơnguh broă lơh sa. Bơdìh hơ̆ gam ròng iar, ada nàng sa phan sa jơngkah tàm mpồl ling, kung là nàng geh tai phan sa drơng rài kis ai oh mi kwang bàng tàm bồt in sơl. Bồt kung geh ròng 9 nơm so, cèng tus bơta chờ hờp tơnơ̆ dùl ngai lơh broă bòl glar, ròng iar, ròng sur mờ ada nàng lơh rài bồ tơngoh tơnơ̆ dùl ngai lơh broă bòl glar”.

Sơr lèt gan ală nsừc dà dờng sùm ơm kơ̆p gơ mut tơn tàm măi mok rơkị jun mpồl lơh broă sồ 9 mut tàm ală bồt, bol añ kung tus geh ală ƀồt pơrđồng tơlir lơngơm, bềng nhơm tờm chi bè bồt Sinh Tồn, bồt Đá Tây A, bồt Song Tử Tây mờ bồt Trường Sa. Tàm do geh tơl ală bơta tờm chi sa plai niam ngan bè bơl hông, lơ u, pơ ò, tào, plai màk, plai sơ moan, bal mờ ală sèng tờm chi mùl gŏ is ngan bơh Trường Sa dê bè tờm ƀàng vuông, phong ƀa, tra, nhàu, den phi lao, lơ u, mù u. Bi Lê Thị Kim Thi gam ơm kis tàm bồt Sinh Tồn yal wơl: “Bơh chờm añ kung kơlôi rài kis tàm bồt kal ke ngan, mơya tus tàm do gŏ chi che niam gơs ngan. Ling klàng den rềp mềr bơnĕ bơnài bal mờ gơ̆p”.

Ù tam biăp geh cèng bơh ù gờl, tuh mờ dà bè ờs, dà mìu. Nhai 2 tus nhai 5 là kàl biăp tơlir niam. Lồi nam mìu uă dà lềng hang gơmŭt tàm bồt den biăp gơtìp ồm, den tàng ală cau ling mờ làng bol pal jun biăp tus tiah jơnhoa rlau nàng pleh gơtìp dà lềng mut. Klau pơgru Trương Hồng Lĩnh, ơm tàm ƀồt Sinh Tồn pà gĭt: “Añ tam bơkào mờ tờm bơka niam, ròng sềm. Biăp sàng goh gơm, ờ gŏ ƀồm sơnơm mờ geh biăp bòk ngòk, biăp rơhum, mồng tơi, húng cañ, thì là, plang, mrĕ, diếp ká, biăp bơtang, đơs bal ngan là uă ngan..”

 Ling klàng tàm bồt dồ nùs bal ờ mìng lơh ngan tam uă biăp, tờm chi geh ñhơm glòm tơlir jơh gùt bồt lơm mờ gam lơh niam tai bơta niam rài kis dờng ngan ai làng bol ơm kis tàm tiah do in.