Mho ngai 02/07, Mpồl duh broă Làng bol càr Dăk Lăk neh bơyai lơh dơ̆ pơrjum dơ̆ sơnrờp Mpồl duh broă Làng bol càr Dăk Lăk khoă X, tơngai lơh broă bơh nam 2021- 2026, tơnơ̆ tŭ lơh jăt broă rơndăp tăp sèng tơmŭt bal nhàr ù tiah sră pơ àr gơnoar ătbồ dê tơn. Tàm dơ̆ pơrjum, Mpồl duh broă Làng bol càr Dăk Lăk neh yal Jơnau lơh nền bơh Anih duh broă Lơh kơnòl broă sùm Quôk hội dê bè broă sồr kwang bàng ăt ală gơnoar broă đơng lam tờm ngan. Mò Cao Thị Hoà An, Phó Ƀí thư Duh broă sùm Tỉñ ủy càr, geh sồr ăt gơnoar broă Củ tịc Mpồl duh broă Làng bol càr Dăk Lăk tơngai lơh broă bơh nam 2021- 2026; ồng Trần Phú Hùng, Kwang bàng Mpồl Lơh kơnòl broă sùm Tỉñ ủy càr mờ ồng Đỗ Thái Phong, Kwang bàng Tỉñ ủy càr, geh sồr ăt gơnoar broă Phó Củ tịc Mpồl duh broă Làng bol càr; mò Phạm Thị Phương Hoa ăt gơnoar broă Lam bồ Mpồl lơh broă kơrnoăt boh lam; mò Phan Thị Hà Phước lơh Lam bồ Mpồl Lơh sa- Kes priă; ồng Lê Văn Cường ăt gơnoar broă Lam bồ Mpồl Niam chài- Mpồl bơtiàn; mò Đỗ Thị Như Tình, lơh Lam bồ Mpồl Jơi bơtiàn.

Đơs tàm dơ̆ pơrjum, mò Cao Thị Hoà An, Củ tịc Mpồl duh broă Làng bol càr Dăk Lăk đơs sùm, mờ bă ù geh is rlau 18 rbô kơi sồ vuông, khà kờp làng bol rlau 3 tơlak 340 rbô nă cau, Dăk Lăk gơgơs là dùl tàm pe càr dờng ngan rlau jơh gùt lơgar bè khà ơnàng ù tiah, dùl ƀòn lơgar geh wil tơl bơta nàng bơtàu tơngguh tơl làm ală broă là tŭ niam nàng lơh geh bơta gơn kơnờm pa, ù tiah bơtàu tơngguh pa ai càr Dăk Lăk in tàm tŭ tơngai bơtàu tơngguh pơn jăt tai.