Drim ngai 25/06, tàm càr Quảng Bình, Tổng Ƀí thư ồng Tô Lâm mờ Mpồl lơh broă Dà lơgar dê neh lơh broă mờ Mpồl Lơh kơnòl broă sùm Tỉñ ủy càr Quảng Bình mờ Mpồl Lơh kơnòl broă sùm Tỉñ ủy càr Quảng Trị bè cồng nha lam lơh jăt ală jơnau lơh nền tàm pơrjum, jơnau đơs pơndŭt Dà lơgar dê mờ bàr pe kơnòl broă tờm kwơmàng bơtàu tơngguh lơh sa- mpồl bơtiàn, gàr niam sền gàr dà lơgar, lơngăp lơngai tàm ù tiah càr Quảng Bình, Quảng Trị. Dơ̆ lơh broă geh lơh tàm bơta bàr càr Quảng Bình mờ Quảng Trị gam lam lơh gùng dà tơrgùm dùl nàng tơnggơs mpồl lơh broă sră pơ àr gơnoar ătbồ pa sơnđan măt càr Quảng Trị. Jăt jơnau dan, càr Quảng Trị tơnơ̆ tơmŭt bal rơ̆p geh 78 mpồl lơh broă sră pơ àr gơnoar ătbồ kâp sàh. Anih tờm lơh sră pơ àr gơnoar ătbồ- cíñ trị lơh tàm ƀòn dờng Đồng Hới.

Tàm dơ̆ lơh broă, Tổng Ƀí thư ồng Tô Lâm bal mờ mpồl lơh broă Dà lơgar dê iăt đơng lam ală ƀòn lơgar yal bè tơngai lam lơh ală jơnau lơh nền tàm pơrjum, jơnau đơs pơndŭt Dà lơgar dê; broă lơh rơndăp tăp sèng mpồl kwang bàng mpồl lơh broă bơh ƀòn lơgar dê tơnơ̆ tơrgùm dùl; bal mờ ală jơnau dan, jơnau sồr nàng kờñ tă bơsong kal ke, gàr niam cồng nha mờ bơta kơ̆ kơl jăp tàm ală tŭ lam lơh jăt.