
Jăt jơnau yal bơh Anih duh broă Làng bol càr Dăk Lăk dê, ală nhai bồ nam do, lơh gơlik phan bơh lơh sa mờ măy mŏk, kă bro phan mờ lòt nhơl geh bơta bơtàu tơngguh niam. Khà năc lòt nhơl gơguh tus mờr dùl dơ̆ mờ nggùl pơndrờm bal dùl tŭ mờ nam lài. Bơta pơnrơ ngan là rề dia lơh geh rlau 5 rbô tơmàn đong, gơguh rlau 35% pơndrờm mờ lài.
Bulah bè hơ̆, bal mờ ală cồng nha niam ngan, càr Dăk Lăk kung gam tìp mờ bàr pe kal ke. Ồng Nguyễn Thiên Văn, Ătbồ ing Củ tịc Anih duh broă Làng bol càr Dăk Lăk sồr ală ƀòn lơgar mờ mpồl tơrgùm tă bơsong bơta gơkòl, tơngguh mhar khà ai priă bơcri dà lơgar, wèt tus lơh sir ală broă jàu bơtàu tơngguh lơh sa- mpồl bơtiàn bơh jơh gùt nam 2025 dê.
“Bè jơh ală broă sền bal là niam, mơya ai priă ODA là ờ niam, bol he sền song tơn mờ lơh bè lơi tơngguh geh priă ODA. Bè rề dia broă lơh priă jền kâp càr là 1 rbô 140 tơmàn đong, mờ kâp kơnhoàl lơh jăt 1 rbô 600 tơmàn đong. Bơh tŭ do tus lồi nam, kâp càr gam 600 tơmàn đong, ai kâp kơnhoàl pal lơh jăt 700 tơmàn đong tai den hơ̆ sồng lơh broă broă rơndăp lơh dê jàu. Gơ wèt mờ kâp càr digơlan niam, is gơ wèt mờ kâp kơnhoàl, tŭ jun kơnòl broă tus hờ kâp sàh den ờ ƀươn soh lơi mờ rề. Broă do, ală oh mi pal kơlôi tus”.
Tàm Pơrjum Mpồl Duh broă Đảng ƀộ càr Dăk Lăk dơ̆ 33 (rề ơnàng), ală cau ala măt neh cribơyai, ai jơnau đơs uă tơngume kwơmàng rơcăng ai Pơrjum dờng cau ala măt Đảng ƀộ càr dơ̆ XVIII in, tơngai lơh broă bơh nam 2025- 2030. Jăt jơnau rơcăng cih Jơnau yal cíñ trị sền tàm Pơrjum dờng Đảng ƀộ càr tơngai lơh broă tus, càr Dăk Lăk pa geh 17 broă jàu tờm tàm ală broă lơh sa, niam chài- mpồl bơtiàn, tiah ơm kis, sền gàr dà lơgar, lơngăp lơngai mờ bơ̆t bơtàu Đảng. Mơkung gĭt nền 5 mpồl kơnòl broă, broă lơh tờm bal mờ ală broă tam gơl pràn kwơmàng nàng kờñ lơh geh ngan ngồn jơnau kờñ bơtàu tơngguh mhar, kơ̆ kơl jăp.
Pơrjum kung tơrgùm cribơyai mờ ring bal uă mờ tơngume jơnau rơcăng cih Ală jơnau neh lơh nền tơnggơs Đảng ƀộ càr Dăk Lăk tàm bơnàng jăt tơrgùm dùl bàr Đảng ƀộ càr Dăk Lăk mờ Phú Yên. Jăt hơ̆, tơnơ̆ rơndăp tăp sèng, jơh gùt càr Dăk Lăk (pa) rơ̆p geh 108 mpồl Đảng gơ wèt Tỉñ ủy càr, mờ kờp jơh mờr 140 rbô nă đảng viên.

Ồng Nguyễn Đình Trung, Ƀí thư Tỉñ ủy càr Dăk Lăk sồr tàm ală tŭ lơh sră nggal, ală kâp, gah, ƀòn lơgar pal pơn jăt tai dong kờl, tă pơgồp jơnau đơs bè tơngume Pơrjum dờng mờ tơnggume ală rơndăp broă lơh tờm kwơmàng. Tàm hơ̆, broă jòi, lơh niam bơta ƀươn bơh jơh bal bàr càr Dăk Lăk mờ Phú Yên dê tơnơ̆ tơrgùm dùl pal tơkuĕ bal jơnau sồr bơtàu tơngguh tơl làm.
“Kơlôi sơnơng nàng lơh geh bơta ƀươn càr Dăk Lăk yau mờ càr Phú Yên yau dê, bàr tai là pal lơh geh wil tơl ală kơnòl broă tờm bơh 2 càr dê mờ ờ gŏ di là mìng bè lơh sa ir kung ờ gơtùi sơl, broă sền gàr lơngăp lơngai rài kis mpồl bơtiàn, sền gàr dà lơgar lơngăp lơngai, prăp gàr ală bơta kwơ niam chài pal sền ngăc ngan. Ai broă tam gơl pràn bè mpồl kwang bàng, bol he pal tam gơl den hơ̆ sồng bơtàu tơngguh geh, mờ jơnau sồr uă bơh Dà lơgar, bơh Làng bol dê mơkung broă lơh yau den ờ tŭ lơi bơtàu tơngguh geh ờ. Nam 2025 rơndăp tăp sèng mpồl kwang bàng mpồl lơh broă là dùl dơ̆ tam gơl bơta yau gơgơs bơta pa mơya is càr Dăk Lăk rơndăp tăp sèng kwang bàng kung là dùl dơ̆ tam gơl bơta yau gơgơs bơta pa sơl”.
Viết bình luận