Nha lộc vừng bơnung geh bơta sơƀơ̆t dồ ết, tŭ sa geh gơlơh rơƀă mờ mbir dồ ết. Nha lộc vừng geh pĭc tàm kàl prang, tŭ tờm chi gơlik uă cồng bơnung. Kòn cau Rơđê sùm ngui nha lộc vừng bơnung nàng sa ris, sa bal mờ ală bơta biăp brê ndai halà cĭk bal mờ ka ngài, mắm ruốc. Nha lộc vừng kung geh ngui nàng trŭ gơm ală phan sa bè phan sa gòih, is ồn là gòih ka, ƀŏ bal mờ ka ro mờ ka hồl. Bi H’Lop Niê, ơm tàm ƀòn  Sah B, sàh  Ea Tul, kơnhoàl Čư̆ Mgar, càr Dăk Lăk pà gĭt, nha lộc vừng bơnung sa sơbơ̆t dồ ết, hòi dồ ết bơh mreh lir, cèng bal bơta mùl gŏ ngan bơh brê bơnơm Tây Nguyên ngan là bơta tờm lơh geh bơta is ồn ai phan nha lộc vừng bơnung ƀŏ bal mờ ka hồl.

Bi H’Lop Niê, đơs: “Phan sa do bơkah ngan, gơ dờp ngan mờ piang duh. Do ngan là phan sa ka hồl ƀŏ bal mờ nha lộc vừng bơnung. Ka den tă jơh bồ mờ ntìng, nha lộc vừng den pĭc tàm kềng gah drà croh, tàm mìr, den cèng ƀŏ bal mờ mrĕ, phan tĕ ndai mờ hàñ kòn cau. Phan sa do geh tàm dơ̆ sa sào pah ngai bơh kòn cau Rơđê dê bơh jŏ ngan rao”.

Tŭ mat tơngai pa lik, kòn cau Rơđê neh rcang phan nàng lòt lơh broă tàm mìr. Bơdìh mờ ală sơ̆ ơn kơn jơ̆ ngan phan, ờ gơtùi ờ geh ală phan sa ƀarah ƀarài, ƀuơn ngan, mơya kung gam tơl làm phan sa pràn să ai dùl ngai lơh broă jŏ jòng in. Mờ nha lộc vừng bơnung ƀŏ bal mờ ka hồl là dùl tàm ală phan sa bè hơ̆. Phan sa nha lộc vừng bơnung ƀŏ bal mờ ka hồl geh sa bal mờ piang duh bal mờ biăp ris, lơh geh dùl dơ̆ sa ƀarah ƀarài mơya bơkah ngan.

Bi H’Đô Niê, ơm tàm ƀòn Sah B, sàh Ea Tul, kơnhoàl Čư̆ Mgar, càr Dăk Lăk pà gĭt, broă lơh geh phan sa do ờ kal ke ir, mơya nàng lơh geh bơta bơkah den kờñ pal geh bơta chài, nền nòn bơh cau trŭ phan sa dê: “Nha lộc vừng bơnung tàm kàl do là bơkah ngan rlau jơh, dilah trồ mìu den ờ gam bơkah tai, nha lộc vừng rơ̆p gơbàn kra ờ gam bơta rơƀă mờ bơnung tai. Phan sa do geh bơh brê bơnơm lơm, nha lộc vừng gơtùi tam gùt dar hìu halà pĭc tàm mìr, tàm brê. Ai ka den kung digơlan lòt đàr is tàm dà croh, dà dờng den hơ̆ sồng rê trŭ gơm halà blơi ka hồl bơh tàm drà”.

Ka hồl ƀŏ bal mờ nha lộc vừng là dùl phan sa bơkah cèng bơta mùl gŏ tàm niam chài phan sa krơi is ngan bơh kòn cau Rơđê dê, tơngŏ bơta bơceh lơh tàm broă trŭ gơm phan sa. Phan sa do sùm geh ngui tàm dơ̆ sa hìu bơnhă, halà tàm ală dơ̆ lơh chờ bơh ƀòn dê. Is ồn tàm nhai 3, tŭ ù tiah trồ tiah Tây Nguyên gam mut tàm kàl prang nam pa, phan sa do ờ mìng là phan sa cèng bơta bơkah bơh ù tiah brê bơnơm dê lơm mờ gam geh bơta pơgồp bal mpồl bơtiàn mờ sền dờng màng phan bơna trồ tiah dê cèng wơl.