Ùr ơruh kòn cau Bơnhàr lơh geh bơta niam tàm ồi yau
Chủ nhật, 06:00, 09/02/2025 Cau mblàng Ndong Brawl/Cau cih H’ Zawut (VOV Tây Nguyên) Cau mblàng Ndong Brawl/Cau cih H’ Zawut (VOV Tây Nguyên)
VOV4.K'Ho- Gơwèt mờ ală jơi bơtiàn oờ gal cau cau kis tàm Tây Nguyên đơs bal mờ kòn cau Bơnhàr đơs is, phan ồi yau ờ mìng là ală phan geh tàñ mờ tê, mờ gam là bơta niam bơh jơi bơtiàn do dê. Tềng đăp mờ bơta gơlòt sùm bơh rài kis pa, geh uă oh mi cau ùr kòn cau Bơnhàr geh bơsram sùm nàng pơgồp bal tàm broă prăp gàr bơta niam ồi yau. Tàm hơ̆ ờ gơtùi ờ yal tus ùr ơruh Kerry, deh nam 1995, kis tàm hìu sồ 191, gùng Phan Chu Trinh, sơnah ƀòn Thắng Lợi, ƀòn dờng Kon Tum, càr Kon Tum neh lơh ngan prăp gàr mờ bơtàu tơnguh ồi yau, bơh ală pang ồi ờs mờng tus mờ ală bơta phan pa, geh uă bơta niam chài mờ lơh sa uă.

Kerry là dùl nă cau ùr kòn cau Bơnhàr Rơ Ngao kis tàm dùl hìu nhă neh geh 4 rài mìng tàñ ồi yau. Bơh tŭ gam dềt, lŏ neh geh mè bal mờ mò bơto broă tàñ ồi yau, do là dùl broă lơh mờ cau ùr kòn cau Bơnhàr sền là pơnyờ să ngan bơh jơi bơtiàn dê. Ală pang ồi yau sơnrờp ngan geh tàñ gơs bơh mpàng tê lŏ dê mìng là ală pang ồi nàng ngui tàm rài kis pah ngai tàm hìu nhă bal mờ tăc cau ndai in. Mơya mờ broă bơceh lơh bal mờ git tàm broă kă bro, lŏ gŏ là ồi yau kòn cau Bơnhàr gơtùi lơh geh uă bơta rơlao, di lah bè git pơgồp bal đah bơta niam pa mờ ờs mờng.

Lŏ Kerry yal: “Di lah đơs bè broă tàñ ồi añ neh sơn đờm lài, bơsram bơh tŭ gam dềt, tàm pơgăp 8 sơnam, añ bơsram jăt mè, jăt mò mờ añ neh git tàñ bloh, mơya añ lòt bơsram tàm ƀòn dờng Hồ Chí Minh, tơnơ̆ mờ hơ̆ añ rê tàm do nàng prăp gàr bơta niam ờs mờng bơh hìu nhă dê, añ kờñ pơn jăt tai ngui bơta niam chài kòn cau añ dê”.

Jơh bơsram tàm Hìu bơsram Đại họk Văn hoá Nghệ thuật, mơya mờ nùs nhơm kờñ lơh niam tàm ală pang ồi yau den tàng lŏ ai jơh tơngai nàng bơceh lơh ală phan ndai bơdìh mờ ală ào, ồi ờs mờng bơh tàm ală pang ồi yau ờs mờng geh tàñ mờ tê. Lŏ sơn đờ bơceh lơh mờ ală bơta phan pa, bơh kơl dung trao, sơgơn, tus mờ ală phan bơka, ào bes, ào kăp, ào jòng… tơl phan là dùl broă pơgồp bal đah niam chài ờs mờng mờ ƀuơn ngui tàm rài kis pa.

Bi Nguyễn Mạnh Hùng, dùl nă cau chài lơh phan soh kis tàm ƀòn dờng Pleiku, càr Gia Lai pà git, ală bơta phan tàñ gơs bơh Kerry dê ờ mìng niam tài bơh broă pơgồp bal bơh phan ờs mờng mờ pa dê, mờ gam geh bơta kơl jăp uă, ai geh bơta niam cau soh in. “Añ kung là dùl nă cau lơh phan soh sơl, bơta kwơ màng añ gŏ geh kung là dùl bơta phan ồi yau, mơya neh geh broă lơh krơi is, pơgồp bal đah pa mờ ờs mờng. Tŭ ƀư tàm ală bơta phan mai mờ tê mờng geh bơta phan kră kơl dang tềng bơdìh, mơya soh tàm să hơ̆ sồng gơlơh geh bơta lơbơn niam”.

Bi Trần Tuấn Hùng, dùl nă cau tus bơh ƀòn dờng Hồ Chí Minh yal: “Ngai do añ geh bơta niam tŭ soh tơrlòng ală phan tàñ bơh Kerry dê. Dơ̆ sơnrờp añ soh den gơlơh ram ngan, kờñ ngan, ală bơta nền nòn geh tàñ tàm ală bơta phan niam, nền nòn ngan. Tŭ soh tàm să añ gơlơh bè tus bal mờ bơta niam chài kòn cau Bơnhàr tàm do dê, sơlơ tơnguh tai nùs nhơm kờñ gơboh, broă pơgồp bal đah oh mi cau Yoan mờ kòn cau Bơnhàr dê”.

Sơrlèt mờ ală kal ke bè ală jơnau kơlôi kờñ tàñ gơs phan bơka niam di pal mờ jơnau kờñ drà kă bro pa dê, mơya kung gam gàr geh bơta niam tờm ngan bơh ồi yau kòn cau Bơnhàr dê, phan tàñ geh is tus mờ drà kă bro, hìu tăc bơh lŏ dê neh pờ ơnàng tus tàm ală càr, ƀòn dờng ndai tàm lơgar mờ lơgar bơdìh. Tus tŭ do, Kerry geh bàr hìu tăc tờm ngan là tàm ƀòn dờng Kon Tum, càr Kon Tum mờ tàm ƀòn dờng Dà Làc, càr Lâm Đồng. Lŏ Kerry pà git: “Phan tàñ añ neh tăc tam uă lơgar bè: Lo, Hàn Quốk, Mỹ, Đức, Thụy Sỹ, Malaysia… Añ kờñ ngui bơta niam chài kòn cau añ dê, ờ mìng tàm lơgar, tàm ù tiah ƀòn lơgar añ mờ gam tus tàm dunia”.

Lŏ Kerry ờ mìng là cau chài tàñ ồi yau gam kơnòm kờñ gơboh mờ broă tàñ ồi yau, mờ gam là cau bơto ală bơyô gam kơnòm tàm mpồl bơtiàn in. Jơnau bơh lŏ dê pà cơng tàng niam ai bơta gơboh kờñ mờ broă tàñ ồi yau bal mờ broă bơceh lơh sùm. Ală bơta phan tàñ ồi yau bơh Kerry dê ờ mìng prăp gàr bơta niam chài mờ gam lơh geh bơta niam pa ai cau ùr kòn cau Bơnhàr in, mờ ai tơngŏ broă bơceh lơh, lơh sùm mờ nùs nhơm pơnyờ să jơi bơtiàn dê bơh pang ồi yau, bơh tơl phan geh tàñ gơs dê.

Cau mblàng Ndong Brawl/Cau cih H’ Zawut (VOV Tây Nguyên)

Viết bình luận

TIN CÙNG CHUYÊN MỤC