Jay jêt bah 3 hê oh yuh Rah Lan H’Kưm ta ƀon Chuét Ngol, xă Chư Á, nkual ƀon têh Pleiku, n’gor Gia Lai răm m’ak lơn rnôk ăp mê̆, ăp yuh lah công an mpeh tâm Rmôt bu ur công an n’gor Gia Lai tât khâl n’hanh pâl rlưn đah ăp kon. Yuh têh bah 2 hê oh jêt lah H’Kưm năm aơ mhe 15 năm deh an gĭt: mê̆ n’hanh bơ̆ bah 3 oh yuh lĕ khĭt tă aơ 6 năm. Bah nĕ tât aƀaơ, Rmôt bu ur Công an n’gor dơn mât rong bah nău ngêt sa, gŭ âm, tât nău nti an 3 hê oh yuh. Ăp oh dơi ăp mê̆, ăp yơ công an ntrŭt nsôr, mât uănh ăp nău: rnôk ri an kho ao mhe, rnôk an tay ndrôm sam ƀŭt n’hanh ăp ndơ dŏng nti. H’Kưm lah:

Ăp nar, lah geh nău ri oh dơi kuăl đă ăp yuh kơl. Ăp yuh ntrŭt đă mpôl oh mô dơi ntlơi nti, an tâm rnglăp mât rong ndrel. Oh dơi saơ dơi oi jêr jŏt n’hanh dơi răm. Oh nsrôih gơih gay tâm di đah nău mât uănh bah ăp yơ mât rong.

Mô êng oh yuh Rah Lan H’Kưm, ta Gia Lai hôm e geh 31 kon se kon đơi, dŭt âk lah nuĭh rnoi mpôl đêt dơi ăp gưl rmôt kan bu ur Công an n’gor Gia Lai dơn mât rong. Đah tơm prăk rgŏ jă bah cán bộ, tahen tâm ăp ntŭk kan n’hanh rgŏ jă tâm rgop, rmôt kan bu ur tŏng ăp prăk an ăp mon bah 4 tât 5 rkeh prăk/năm. Rnoh prăk aơ kơl kon se kon đơi geh tay ndơ an prăk nti n’hanh năp ăp nău ŭch khlay. Thượng tá Nguyễn Thị Ngọc Thúy-Rmôt bu ur Công an n’gor Gia Lai an gĭt, âk mon dơi dơn mât rong, aơ geh nău nti nsơm blău, nar lơ hăn ndrel đah ăp mê̆ mât rong:

Rlău ma nău mât uănh chop khâl nău nti nsơm, săk soan bah ăp kon, nar ru gâp tât jay khâl, ndơ̆ ăp kon hăn pâl. Gâp ndơ̆ ăp mon sĭt jay êng bah gâp gay mon geh nău bên hăn nsong đah oh kon bah gâp. Rnôk nti, ăp nău ăp mon lah, kuăl điện mô lah nchih nău an mê̆ n’hanh ăp mê̆ dôh rklaih, tâm pă. Nĕ lah nău dŭt rhơn.

Ndrel đah nău mât uănh bah ăp gưl bu ur, năm 2022 xă Phú An, nkuăl Đăk Pơ lĕ geh jrô nti an nuĭh mô gĭt rplay sam ƀŭt an oh yuh nuĭh rnoi mpôl Bahnar. Knơm nĕ, bah ntŭk mô gĭt rplay sam ƀŭt, âk oh yuh lĕ gĭt răk, gĭt nchih, gĭt kơp tăch rwăt ndơ. Yuh Bùi Thị Minh Dương-Kruanh Hội Liên hiệp bu ur xă Phú An, nkuăl Đăk Pơ an gĭt, bah săk rnglăy aơ, ntrong kan pơk jrô nti lĕ dơi pơk hvi ăp xă êng. Năm aơ, rmôt bu ur ăp xă Yang Bắc, Yang Hội pơk tay 2 jrô ntĭm sam ƀŭt, wăch rgum geh 160 oh yuh râng:

Oh yuh hôm e âk nău ndrăt, hăn nti hôm e prêng, mô janh răk klach tih nai gơm mô lah âk yuh jao bài sĭt jay mô geh nchih. Ôp nkô̆ nău ri ăp yuh lah djôt mâng nchih hôm e jêr lơn lah djôt kŭk ƀư mir. Rnôk dơi nchih bôk năp ri nĕ lah nău ntrŭt an ăp oh yuh gơih lơn. Tât aƀaơ, ăp yuh lĕ gĭt răk, gĭt nchih, dơi nti bài ndrel kon n’hanh dơi wât ta mang internet gay kơt dŏng tâm nkra njêng, jŭt n’hŭch ach o.

Wa Rơ Chăm H’Hồng-Kruanh Rmôt Liên hiệp bu ur n’gor Gia Lai an gĭt, bah meng nău dơn mât rong kon se kon đơi n’hanh pơk jrô nti sam ƀŭt an oh yuh nuĭh rnoi mpôl đêt, ăp gưl rmôt bu ur ta n’gor hôm e geh prăk kơl hăn nti an kon hŏk ach o nti gĭt, rlet rlău jêr jŏt, ndâk ƀư ngih wâl tâm  kơl, ntop kơl prăk an bu ur, an tơm tăm mpa rong. Tă bah nĕ, hang rbăn kon se n’hanh bu ur dơi ntop kơl:

Tâm năm tât, Hội Liên hiệp bu ur Gia Lai mât uĕh tay ăp săk rnglăy dơi geh; ntĭm rđău ăp gưl rmôt nti tay nău blău ơm ăp ntrong ƀư ta ƀon lan n’hanh lam n’gor gay kơt dŏng tâm rnôk hun hao wăng sa rnăk wâl. Nkre mbơh ƀư ăp ntrong kan, câu lạc bộ n’hanh ăp ntrong kan wăch rgum nău tât râng bah rmôt nuĭh; rnê nkhôm ntrŭt đă, rnê rhơn ngăch ăp nuĭh, ntrong kan ntoh lư gay pơk hvi tâm ăp gưl rmôt.

Đah nău rŏng n’hanh ăp nău ƀư ngăn ngên, rmôt bu ur ăp gưl ta n’gor Gia Lai dôl kơl an kon se kon đơi n’hanh bu ur nuĭh rnoi mpôl đêt dơh oi jêr jŏt, rgop ƀư uĕh trong kan đăp mpăn nău rêh jêng ta ntŭk./.