Nau mbơh ta rơh rƀŭn Quốc hội nchrăp 6 khay bôk năm, hun hao GDP bah Việt Nam hao âk, geh 5,8%. Ăp ntoh măt ân lah, 6 khay dŭt năm bol ma hôm jêr, yơn mpŏng hun hao GDP năm 2024 geh 6,5%, rnơm ăp nau kơl an geh ntrŭnh ngăch tơm prăk ntuh kơl, nau kan ndrel tăch luh ndơ dôl geh ndâk ueh, ngăn lah nau kơl an, doh rklaih nau jêr ân jâng văng sa lŏ geh Chính phủ rđau ƀư ngăn.

Gay dơi geh nkô̆ nau hun hao 6,5% năm 2024, du đê̆ ntoh măt Quốc hội ân lah, ân geh kơl an nau kan tơm prăk bah lam nau kan ntrŭt dăng ăp ntil; n’hao tay nau pă tơm prăk ntuh kơl nsum gay đăp mpăn nau dơi ngăch ndrel rgum, ngăn lah ăp nau kan bah ăp ntŭk ntu dŏng kan khlay. Wa Trần Hoàng Ngân, rmôt kan bah nkuăl ƀon têh Hồ Chí Minh, ân lah:

‘Phung he geh du nau nsôih prêh ngăn, rnơm lah năm aơ nơm mra dơi geh dơi nau hun hao 6,5%. Phung he lŏ ntrŭnh ăp nau kan ntơm bah bôk năm lah 12 nau kan, tâm nê geh 3 nau kan rgâl mhe. Tal bôk năp lah nau rgâl mpeh ntrong rƀŏng nsum lah nơm ntrŭt dăng nau pă gưl kan ân ăp nkuăl gay ƀư ueh nuih n’hâm nchrăp kan, blau nau njêng mhe êng bah ăp nkuăl. Tal bar lah rgâl mpeh ntŭk ntu nau kan, nơm ân geh ƀư ăp nau kan lam ntrong mpeh prăk kaih kơl an nau ndâk ndrel hun hao văng sa, ntuh kơl nsum ân ntŭk ntu gung trong, ngăn lah ăp ntŭk geh trong hăn”.

 Chính phủ nchrăp luh nau kan, ntrong kan tơm, tâm nê, nau kan bôk năp lah rgum ƀư jêh nau kan, pháp luật, nau kan gay doh rklaih nau jêr, nkol ân ntŭk kan tăch rgâl, rjlaih ntrơn nau tơm ân hun hao văng sa, rêh jêng. Wa Nguyễn Chu Hồi, Rmôt kan bah nkuăl ƀon têh Hải Phòng, mbơh, nkô̆ nau hun hao GDP lah geh nau dơi:

 ‘Ngoai hôm lah đăp mpăn văng sa. Tal bar lah bah nau ngăn bah 6 khay, bol ma nơm kŏ geh jêr yơn lah rđau nsôih ƀư nau kan rjăp khlay ngăn, tâm rnôk ƀa hin ri lŏ lơn ma khlay, nau tâm ban tă bah Trung ương jur nkuăl ân geh nsum ty ndrel ndrel, ân geh ƀư ngăn đah nau kan ngăn, đah ăp nau dơi geh bah ăp nkuăl, rnôk nê nơm mơ dơi geh du nau geh nsum ân lam dak du trong ueh ngăn”.

 Kŏ tâm pơh rlau aơ, Quốc hội djăt ndrel nchră nau mbơh bah Chính phủ mpeh nau rgâl prăk khay ntơm du rkeh 800 rbăn’khay, hao jêng 2 rkeh 340 rbăn/khay ntơm lơ 1/7/2024; rgâl prăk khay rlu ranh, kơl an bảo hiểm xã hội, kơl an nŭih geh n’hâm. Ăp ntoh măt tâm ban nau ma Chính phủ mpeh nau ƀư rgâl rnoh prăk khay ntơm du rkeh 800 rbăn/khay hao jêng 2 rkeh 340 rbăn/khay, ân lah aơ lah rnoh ân geh kơp dơn tâm nau rgâl prăk khay, rgop nau rgâl, n’hao nau rêh ân nŭih sa prăk khay, njêng nau nsôih n’hao nau pah kan ndrel săk tam nau kan. Wa Trần Văn Lâm, rmôt kan Bắc Giang, ân lah:

 ‘Rnoh prăk khay nchrăp geh rnoh prăk ân ƀư lôch nau kan rgâl prăk khay tĭng nau ndâk ƀư lah rlau 900 rbăn rmen. Dŏng prăk nê gay ma n’hao prăk khay kŏ hao tŏng rnoh prăk khay ơm ri ăp nŭih mpeh nau ngăn lah geh hao lĕ đŏng, mra njêng nau gơih n’or tâm nau kan”.

Du đê̆ nau đă Chính phủ kơl an ăp nau kan đăp mpăn nau ƀư nâp, jŏ jong ndrel săk tam nau kan; N’hao nau ƀư ăp nau kan nkân njrăng, mât rnoh ndrel ăp nau kan nkân nau hao khlay jêh rnôk hao prăk khay. Wa Lê Minh Nam, rmôt kan bah Hậu Giang, đă:

‘Phung he kŏ ŭch geh ăp nau kan đăp mpăn huch dơi ăp nau kan tât mô ueh, ngăn lah nau huch dêh ngăn nau hao prăk khay, yơn geh nsum ma nau hao khlay ndơ, nơih ƀư huch nau khlay bah nau hao prăk khay. Tâm nau nê đă Chính phủ ân uănh ăp nau tât kơt ăp rnôk hao prăk khay bah năp nê ma geh nau khuch tât ăp nau mô ueh, khuch tât nau geh rnoh ndrel hao khlay ndơ ân geh kơl an ntop tay. Rnôk hao prăk khay kŏ ƀư hao tay prăk dŏng nsum, geh tât nau hao khlay ndơ kŏ ân geh uănh ăp nau tât mpeh rnoh ăp ntil ndơ dŏng ƀư”./.