Ăp nău mĭn rluk mâl ơm tâm ƀon lan rnoi mpôl đê̆ ta Lai Châu ntơm nơh geh ring tam âk tât nău khlay bah bu ur tâm rnăk wâl n’hanh rêh jêng kon nuĭh. An ƀư trong nchrăp kan 8 “Tĭng ƀư tâm ban bu ur bu klô n’hanh nkra ăp nkô̆ nău khlay jăch ndăn đah bu ur n’hanh kon se” mpeh bôk nău kan hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang lvang năm 2021 - 2030, rơh bôk I: ntơm bah năm 2021 tât năm 2025 hŏ rgop ƀư rgâl nău mĭn, nău gĭt êng bah nsum mpôl n’hanh nuĭh bu ur nơm. Kơl khân păng nsing nơm năl dơi rnoh khlay bah săk nơm tâm rnăk wâl n’hanh ƀon lan.

Rnăk yuh Tao Thị Coong, rnoi Lự, ta bản Phiêng Chá, xã Nậm Tăm, nkuâl Sìn Hồ (Lai Châu) ntơm nơh lah rnăk dŭt ach o tâm ƀon. Wăng sa tơm bah rnăk wâl kâp nơm tâm mât chăm lŏ dơm, jêng way sa mô ăp nđăp mô tŏng. Rnôk geh nău khlay, ur sai yuh ân tăch mbo, ba. Yor nău mô tŏng ăp nău rêh, mô đêt tơ̆ ur sai yuh jêng tâm janh đŏng.

Bah tơm prăk manh dơh bah trong nchrăp 8 mpeh “Tĭng ƀư tâm ban bu ur bu klô n’hanh nkra ăp nkô̆ nău khlay đah bu ur n’hanh kon se”, rnăk yuh dơi n’gâng kan ta ntŭk n’hanh ăp gưl Hội bu ur ntop kơl, ntĭm nti trong wăng sa.

Nơm geh jăp gơih, ur sai yuh hŏ khai hoang tay neh gay ƀư mir- ntu ka- ndrung n’gar mât rong. Tât aƀaơ, rnăk yuh hŏ geh mir tơm sa play rlău 3.000m2, n’glău ka rlău 1.000m2 n’hanh 5 mblâm ndrôk. Mô dơn klaih rlău ach o, rnăk yuh hôm  jêng rnăk wăng sa ntĭt leo bah ƀon, bah xã. Dơi Hội Liên hiệp bu ur nkoch trêng mpeh pah kan tâm ban bu ur bu klô, ur sai hên way tâm kơl nsum tâm  nău kan tuch tăm n’hanh nău kan ăp nar, mât chăm an ăp oh kon hăn nti  ăp tŏng.

Xã nkual prêh Tà Ngảo, nkuâl Sìn Hồ (Lai Châu) geh 13 ƀon đah 2 rnoi Mông, Dao gŭ rêh. Tă bah nău mĭn n’hanh nău way rluk mâl ơm bah ƀon lan rnoi mpôl đê̆, jêng ntơm  nơm, nuĭh bu ur ta ntŭk wăr năm dơn gĭt kan jâk r’ah, deh nse dơm mô geh nău tam ngơi tâm rnăk wâl. Ndrĭ yơn, nơm geh ăp gưl n’gâng kan, ăp mpôl kan, lơn lah Hội bu ur nsrôih đăm gĭt ntĭm nti pháp luật n’hanh ntop kơl nău tâm di, jêng oh yuh hŏ rgâl mbrơi nău mĭn, tĭng kơn mpơl săk he du trong geh nău tâm ban tâm nău rêh.

Bu ranh ƀon Vừ A Páo, kruanh rnoi Vừ ta bản Thà Giằng Chải, xã Tà Ngảo an gĭt: aƀaơ oh yuh bu ur ta ntŭk hŏ dơi râng ăp rơh hop ƀon, hop rnoi deh n’hanh râng âk nău kan bah ƀon lan, nsum mpôl.

Tâm ban bu ur bu klô dŭt geh nău khlay, mô ƀư jăp pah kan  tâm ban bu ur bu klô ri mbra dŭt jêr jŏt tâm nău mât rhơn răm rnăk wâl; nô nău tâm lah tâm  janh rnăk wâl mbra way geh mbro, lơn lah đah bu ur n’hanh kon se. ntơm bah rnôk gâp hao ƀư kruanh rnoi deh tât aƀaơ ri ƀon gâp dôl gŭ rêh geh 127 rnăk, bơi 800 nuĭh ri ăp nuĭh tĭng ƀư tâm ban bu ur bu klô lah dŭt uĕh. Mô geh nău bu klô lơh bu ur đŏng ôh.

Hội Liên hiệp bu ur Sìn Hồ aƀaơ geh rlău 180 chi hội, rlău 16.000 hội viên, đah nklăp 95% lah nuĭh rnoi mpôl đê̆.

Wa Lâm Bích Hiến, Groi kruanh Hội Liên hiệp bu ur nkuâl an gĭt: dăn đă oh yuh tĭng kơn rgâl nău mĭn, nău gĭt êng, nău nsing nơm nsan hao gay mpơl nău khlay kan bah he tâm rnăk wâl n’hanh rêh jêng kon  nuĭh, ăp năm aơ, ăp gưl hội hŏ nsrôih nkoch trêng, đăm gĭt jru ăp  nkô̆ bah Luật tâm ban bu ur bu klô tât hội viên n’hanh ƀon lan. Bah bôk năm tât aƀaơ, ăp gưl hội tâm nkuâl hŏ nkoch trêng rlău 600 tơ̆, đah bơi 50.000 nuĭh râng. Nău nkoch trêng dơi ƀư đah âk trong kan kơt: ƀư ma sân khấu, rơh tâm rlong, tâm nchră, nkoch trêng mbung... Nkô̆ nkoch trêng rgum tâm ăp nkô̆ nău tâm lah tâm janh rnăk wâl, rdâk njêng rnăk wâl văn hóa, rnăk wâl hun hao jŏ jong...

Hội Liên hiệp bu ur nkuâl Sìn Hồ hŏ an tĭng ƀư ăp nău  kan, gay ntrŭt ntrôl tâm ban bu ur bu klô ta ăp trong kan. Mpôl hên hŏ ƀư nkoch trêng, ntĭm nti n’hao nău gĭt êng tâm ban bu ur bu klô an cán bộ, hội viên bu ur n’hanh ƀon lan ta ntŭk. Nkre, ƀư ăp rơh kơi năp nti mpeh nău hăr blău rêh, nău gĭt pháp luật gay bu ur hun hao n’hanh nsing nơm lơn, bah nê n’hao nău dơi an bu ur.

Ăp nău rgâl tâm nău mĭn, nău gĭt êng mpeh tâm ban bu ur bu klô tâm ƀon lan hŏ nsĭt tay tât ăp nău dơi ngăn ngăn ta Lai Châu, rnôk ăp trong ntĭt leo rnăk wâl hơm răm, geh nău tâm ban, rgâl mhe, rhơn răm nar lơn ma âk. Ăp trong ntĭt leo chi hội, rmôt bu ur, hội viên geh kon, sai mô hôm su ma túy n’hanh nău tih pháp luật hŏ âk lơn. Aơ lah ntŭk nsing gay rdâk njêng nău rêh đăp mpăn, hun  hao. Ta âk ntŭk, bu ur hôm lah n’gâng tơm tâm rdâk njêng ƀon  lan mhe, hăn lor bôk năp tâm hun hao wăng sa, jut jăng ji ngot n’hŭch ach o, ntơm bah nê rgop âk tâm n’gâng kan rdâk njêng ƀon tơm nar lơn ma hun hao ndrŏng uĕh./.