Tâm nchră ta ngih rƀŭn mpeh du đê̆ nkô̆ nau hôm êng bah nau nchrăp Luật Tư pháp nŭih ê tŏng năm, ăp ntoh măt tâm ban rnôk nau nchrăp Luật ntrŭnh ntĭm nti tâm ntŭk Ngih săm ƀŭt ntĭm nchiăr lah nau kan rklaih tĭng trong ndrel ntrŭnh n’hêl nŭih geh dŏng ƀư nau kan aơ. Wa Phạm Văn Hoà, rmôt kan bah Đồng Tháp, ngơi:

‘Nau kan ntĭm nti nchiăr rgum tâm di ngăn đah rnôk aơ bah neh dak nơm, mhâm ƀư đah ăp nŭih ma kon se tih dôih jâk mô lah dŭt jâk ri mô dơi krŭng. Yor lah nơm krŭng tâm rnôk ntŭk kan dôl ma joi n’ôi, mhal dôih ri mra ntơm 9-12 khay, jêh nê ntrơn hăn ri gâp mĭn lah ăp kon se kŏ geh bu krŭng hôm, ri ma ntơm bôk năp lah geh tih ri ƀư tĭng ân nau dơi ntrơn trong rklaih ri gâp mĭn lah ân geh ntrơn tĭng ntrong”.

Ăp ntoh măt đă lŏ kơp ân kloh ăp nau ntrŭnh n’hêl mpeh nau mhal nchâp đah nŭih ê tŏng năm gay đăp mpăn nau đă nkre đăp mpăn nau nkri, njrăng rdâng phung tih dôih, nkre n’hao nau kơl an, ntĭm trong ueh tâm nau rklaih nŭih ê tŏng năm geh nau tih. Nkre ân geh nau kan gay nŭih ê tŏng năm gĭt nau tih, geh nau mĭn ŭch rgâl êng, ŭch êng, nkra êng, rklaih nau tih. Wa Nguyễn Tạo, rmôt kan bah Lâm Đồng, lah rjăp:

‘Nkô̆ nau ƀư bah lôch nau nchrăp luật rnôk aơ ân geh nkô̆ nau ntĭm nti, kơl an ăp nŭih ê tŏng năm tih dôih, nkra nau tih jêng nŭih ueh geh nau dơi. Yơn lah, Điều 40 nau nchrăp ê geh nkah tât nau nŭih ê tŏng năm gĭt kloh nau tih dôih bah nơm ân geh nau mĭn gay rklaih êng, nkra êng ăp nau tih bah nơm. Lah dŏng nchâp ăp nau kan rklaih tĭng ntrong đah nŭih ê toưng năm ma mô tŏng nau dơi kơt mhe nkah ri ƀư ân khân păng mra tŭp tâm nau tih dôih. Kơt nê, nơm mra mô dơi geh nkô̆ dơi bah luật aơ lah gay ntĭm nti ân khân păng jêng kon nŭih ueh ân nau rêh jêng”.

Âk ngăn nau mĭn tâm ban đah nau nchrăp Luật ân geh nkhah nau tih geh nŭih ê tŏng năm tih dôih gay ma rklaih, Yơn lah, wa Lê Tất Hiếu, rmôt kan bah n’gor Vĩnh Phúc ân lah, nŭih tih ê tŏng năm dôl ma âk, âk nau tih bah nŭih ê tŏng năm ƀư nau tih, leo trong tih...Ndri ma, rnôk uănh nau mhal ân geh nau mbơh bah ăp nŭih geh nau tih:

‘Lah nkah êng tih n’ăp ma nŭih tih ê tŏng năm ndrel ăp nŭih geh tĭng tih nsum ân geh rgum tât râng leo 2 nau mhal dôih. Ngăn lah, rnôk nau tih ân geh rklaih nau tât dân sưh tâm nau tih dôih hình sự. Kơt lah nau tâm in pit mpeh nau trok tâm ri mra rklaih tâm ngih phat dôih? Ngih phat dôih mham ăp nŭih ê tŏng năm mô lah phat dôih nŭih hŏ tŏng năm? Điều 40 ntrŭnh nsing tâm nau tât, lah tŏng nau nkhah ri nchâp ân geh nkhah lah nŭih geh nau tât mô dơi nkhah ri ân dơi geh nau kơt tĭng ndrep mô geh nkhah nau tih dôih”.

Ăp ntoh măt đă rnoh geh nau mhal ê geh nsum mpeh nau đă rgâl tĭng ntrong: mô rlau 12 năm gŭ ndrung đah nŭih ntơm 14 năm tât tâm dâng 16 năm ndrel mô rlau 18 năm gŭ ndrung đah nŭih ntơm tŏng 16 năm tât tâm dâng 18 năm ndrel nchâp dŏng ân tâm ban đah ăp phung tih dôih. Nau ntrŭnh kơt nê nkre đăp mpăn geh dơi ƀư kơt ăp nau ntrŭnh rklaih đah nŭih ê tŏng năm tih du nau đah nŭih ê tŏng năm tih âk ntil dôih; nkre mô geh n’hao jâk nau mhal gay rklaih rđil nau ntrŭnh bah Bộ luật hình sự, nkre mô geh ntoh luh ăp nau tât mô tâm ban mhe tâm nau rgum nau mhal./.