Ntơm bah bôk năm tât rnôk aơ, rmôt bu ur n’gor Phú Yên tâm rgop ma ăp gưl kan n’hao nau nkoch trêng, ƀư âk nau kan gay ân geh săk tam nau kan mrô 8-ƀư tâm ban bu ur bu klô ndrel rklaih nau tât ndal ma bu ur ndrel kon se nkuăl rnoi mpôl đê̆. Rmôt bu ur n’gor Phú Yên ƀư njêng 63 ntŭk kan nkoch mbơh tâm ƀon lan. Du rmôt geh 10 nŭih, geh Bí thư chi bộ, Kruanh Thôn, Kruanh bu ur, Kruanh Ban nau kan Mặt trận ndrel ăp rmôt.

Ăp khay, rmôt kan noch mbơh tâm ƀon lan ƀư đê̆ ngăn du nau kan nkoch mbơh, đah âk nau, săch nau nkoch mbơh tâm di ma ăp nŭih râng. Ntŭk nkoch mbơh ƀon lan vay tât ngih ƀon lan gay ma kơp ndrel gĭt nau mĭn nau ŭch bah ƀon lan. Jêh nê, rgop nsum nkô̆ nau nkoch trêng geh nsum ma rklaih nau jêr bah ƀon lan tâm ăp rơh rƀŭn thôn. Êng ăp nkô̆ kơt bonh đă, mbơh ân kônh wa hun hao tuch tăm, nkoch mbơh hôm kơl an ân kon se, der tâm lơh tâm rnăk vâl ndrel gŭ ur sai ơm, jăng lơi nau ƀư ôp brah, bu hŭm phŭ rnôk geh nau ji ndrel mbơh ân ƀon lan tât ngih dak si khám ndrel săm ji. Oh Hồ Ngọc Kim Linh, tâm xã Sơn Hội, kuăl Sơn Hoà, mbơh:

‘Gâp ŭch râng rmôt nkoch mbơh nau aơ gay gĭt âk lơn ndrel dơi der ăp nau tih. Păng mra leo nsĭt ăp nau ueh dơi ân nau rêh ndrel mra ân săk gâp gĭt âk lơn, ân gâp gĭt moh nau tâm di ndrel moh nau tih”.

Tĭng wa Hà Thị Thìn, Kruanh rmôt bu ur xã Ea Trol, nkuăl Sông Hinh, tâm nau nsôih rdâng nau tâm gŭ ur sai ơm lah êng, njrăng nau lơh khuch ân kon se lah nsum, rmôt bu ur bah xã kŏ ndrel ma ăp n’gâng kan, ntŭk kan bah xã tât ăp thôn, ƀon gay nkoch mbơh ăp khay, tĭng 3 khay:

‘Jêh rnôk ndơn nau mbơh đă bah Trung ương kŏ kơt lah n’gor, nkuăl, ri rmôt bu ur hŏ nchrăp nau kan. Jêh nê lah ntrŭnh ƀư tât ăp thôn, ƀon bah nau kan mrô 8 jêh ri nơm leo Luật tât thôn, ƀon gay ma nkoch mbơh tât ăp thôn kŏ geh nau ndâk ăp nau ƀư tâm ban bu ur bu klô ri nơm kŏ ndâk nau kan mô dơi tâm gŭ ur sai ơm, ƀư nau tâm ban bu ur bu klô ndrel ƀư 5 mô tâm rgop ƀư 3 kloh nkre. Ăp 3 khay ri ơm kŏ rƀŭn nsum ma rmôt bu ur ƀư nkoch trêng mro geh tâm ban bu ur bu klô”.

Wa Nguyễn Thị Phương Liên, Groi Kruanh rmôt bu ur n’gor Phú Yên mbơh, rơh rlau aơ, rmôt bu ur n’gor Phú Yên tâm rgop nsum ma N’gâng kan Lao động, Thương binh ndrel Xã hội n’gor ƀư du đê̆ nau ntĭm mbơh n’hao nau dơi ân cán bộ gưl nkuăl, xã mpeh nau blau rklaih nau kan geh tât nau lơh khuch bu ur, kon se nkuăl rnoi mpôl đê̆ ndrel gôl yôk.

Rmôt bu ur n’gor Phú Yên kŏ rđau ăp gưl kan bu ur tâm dâng ƀư pơk rêng hvi ăp nau kan, nau ƀư săk tam kŏ kơt lah nau kan, nau ƀư ntrŭnh kan ndrel dŏng ueh ăp nau kan bah ăp mrôt ƀư nkoch trêng tâm ƀon lan tâm nau kan mrô 8:

‘Đah nkô̆ nau lah tât năm 2025 ri mra ndâk geh 63 nau kan ri rnôk aơ hŏ ndâk geh 45 rmôt kan đah 430 nŭih râng. Ăp nau kan aơ hŏ geh rmôt kan bu ur rgum ntĭm nti mpeh nau blau ndrel nau dơi nkoch trêng ân ăp nŭih bah rmôt”.

Nau kan ntrŭnh ƀư nau mrô 8 lah nau dơi nơih gay rmôt bu ur ăp gưl ndrel ăp ntŭk kan geh tât, n’gâng kan bah nkuăl ntrŭt dăng, mât chăm kơl an bu ur ndrel kon se rnoi mpôl đê̆. Lah ăp nŭih hôm geh nau khuch; ntrŭt dăng tâm ban bau pă nau dơi gay hao jêng, lah rjăp nau dơi bah bu ur, kon se tâm nau ndâk ndrel hun hao ƀon lan, rgop nau ndâk n’gor Phú Yên hun hao nâp nâl./.