Lah ngoai tâm ăp rnăk geh nau rêh jêr ngăn geh kơl ngih yor rôt kan ntoh măt Quốc hội n’gor Dak Lak tâm rgop ma Ngân hàng Quân đội pă, wa Y Nguyên Niê tâm ƀon Jung B, xã Ea Ktur, nkuăl Cư Kuin rhơn ngăn. Rnăk păng rêh ndrâu, ur khĭt bah rnôk aơ 2 năm. Oh kon hăn kan ngai, lơi êng păng ndrel 2 sau jê̆. Ăp nau dŏng knŭng nsing tâm mir cà phê ndrel nau hăn kan bu bah wa. Ngih kđar sat, truh âk năm ma aơ mô geh prăk ma nkra. Ndrel ma rnôk geh ndơn 80 rkeh gay nkra ngih, wa rhơn mô hăk bĭch. Dôl saơ ngih nơm dơi geh ndâk, wa rhơn ngăn. Wa Y Nguyên Niê nkoch:

            ‘Bah năp nơh ngih sat lĕ ngăn, rnôk aơ Ngih dak kơl an rnăk gâp ƀư ngih. Gâp lah ueh ma Đảng, Ngih dak hŏ kơl an”.

            Geh pă ngih kơl an tâm ban rnôk ma wa Y Nguyên Niê tâm dŭt khay 9 mhe rlau, wa H’Sang Pang Ting tâm ƀon Buốc, xã Nam Ka, nkuăl Lắk, n’gor Dak Lak kŏ rhơn ngăn. Rnăk wa ach o, neh tuch tăm mô âk, mô geh kan pah, knŭng hănma bu. Lĕ ngih 8 nŭihsa knŭng nsing tâm nau hăn kan bu, ri ma wa mô janh mĭn tât nau nkra tay ngih. Rnôk geh ndơn ngih bu pă, wa H’Sang nkoch:

            ‘Rnăk hên bah năp nơh jêr ngăn, ngih ri knŭng ngih sat. Rnôk aơ geh n’gâng kan kơl an ngih ân gâp geh ngih nâp ueh kơt aơ ri gâp nơm ndrel ma rnăk vâl rhơn ngăn, kŏ dăn ton mra nsôih âk lơn gay geh hun hao văng sa rnăk vâl ân rklaih ach o”.

            Wa Lê Thị Thanh Xuân, Groi Kruanh rmôt kan ntoh măt Quốc hội n’gor Dak Lak mbơh, êp ăp nau kan, rmôt kan uănh ngăn tât nau kan gay nsum ty ndrel ma ăp gưl kan, ăp ntŭk kan chính trị, rêh jêng gay kơl an ueh lơn nau rêh bah ăp nŭih jêr, ngăn lah ăp nŭih geh kơl, rnăk ach o, rnăk rnoi mpôl đê̆ nkuăl jru, ngai...kơl khân păng hao tâm nau rêh, rgop nau đăp mpăn nau rêh bah n’gor:

            ‘Ntơm bôk năm kan tât rnôk aơ hên hŏ bonh đă, ndâk geh 22 ngih rnoh 1,4 rmen. Tơm prăk mô aka, yơn lah hŏ kơl an nau rêng mpeh nuih n’hâm bah Đảng ndrel Ngih dak mro kơl an tât nŭih geh nau rêh jêr jŏt gay rêng nau rnơm bah ƀon lan, bah cử tri đah Đảng ndrel Ngih dak. Ntơm bah nê ndrel Đảng ndrel Ngih dak ƀư ueh nau kan kơl an tâm nau rêh gay mô geh nŭih geh nchlơi ba kơi”.

            Êp aơ ngăn, tâm nau rƀŭn bah rơh rƀŭn tal 8, Quốc hội gưl 15 geh ƀư ta Hà Nội, Rmôt kan ntoh măt Quốc hội n’gor Dak Lak hŏ geh âk nau rgop khlay gay doh rklaih nau jêr, nkol bah nkuăl. Ngăn lah kơt ntrŭnh ƀư ntung 110 (êp ma n’gor Gia Lai) ndrel dôl geh rnoh 88%, hôm 12% rnôk aơ dôl kol yor ê geh ntrơn ngih vâl ndrel tơm prăk trái phiếu chính phủ. N’gor Dak Lak hŏ geh nau ntrŭnh jao ân N’gâng kan gung trong nchuăn rdeng gay uănh, lŏ ntuh kơl ƀư ân jêh nau kan, der mpŭng. Kŏ tâm rơh rƀŭn aơ, rmôt kan ntoh măt n’gor Dak Lak hŏ lah du nau kan mô ueh bah nau kan bah n’gor, lah du n’gor geh nau dơi gay hun hao điện sial, điện măt nar, yơn rnôk aơ ăp nau kan điện mặt nar bah Dak Lak kơt lah dôl tâm ndơn tăch điện gay ma pă điện neh dak, yor ntŭk nkra điện mô geh đăp mpăn; đă Chính phủ, N’gâng kan Công thương ân geh kơl an nkra ntŭk ntu trong điện. Ndrel ma nê, Rmôt kan ntoh măt Quốc hội n’gor Dak Lak kŏ đă N’gâng kan Lao động-thương binh ndrel Xã hội, N’gâng kan ntĭm nti ân geh nau kan uănh kloh tam bah ăp ntŭk ntĭm nti nau kan, nti ƀa ƀơ ân geh nau rƀŏng, dăp rgum rgum ăp rmôt kan aơ tâm nau ngăn, đăp mpăn nau n’hao săk tam nau kan bah ăp rmôt kan geh Ngih dak ndâk./.