Ntĭm tâm nah bŭt dôl mbăn, yuh K’Hều, tâm thôn 1, xã Đưng Knớ, nkuăl Lạc Dương, n’gor Lâm Đồng nkoch, aơ lah nah ma yuh tanh lôch 2 pơh. Yuh K’Hều nkoch, âk oh nur tâm thôn tâm kơt nti tanh, rnôk ăp ndơ tanh geh tăch tâm mạng xã hội ri geh đŏng nŭih ŭch rvăt:

            ‘Gâp mbơh klơ Facebok kơt lah, ro geh bu lah, lah nơm tanh ri bu ŭch rvăt, ri gâp tanh bar pe blah. Gâp blau păng mra geh dơi tăch đŏng gay ma geh tay prăk ân săk nơm. Nê lah nau ma gâp ŭch lơn, ŭch tanh ân dơi. Dăch tât ri gâp mra hăn nti tay đŏng”.

            Hôm yuh Bon Niêng K’Huyên, gŭ tâm Thôn nkoch, rnơm blau tanh ma yuh geh tay prăk rnôk ru:

            ‘Gâp hăn nti ndrel blau tanh du năm aơ hôm. Lah rnôk ru ri gâp tanh jêh ri hăn tăch tâm Lạc Dương geh nŭih bu rvăt, rnoh nklăp 550-600 rbăn du blah, du khay kŏ geh 4 blah. Rnôk aơ gâp ŭch ngăn ma nau kan geh tanh aơ, ŭch pơk tay jraia ntĭm nti nau kan tanh njuh gay mô roh nau ơm”.

            Rnôk geh nŭih rvăt âk, ăp yuh rgum jêng du rmôt tanh ăp ntil njuh rnôk geh nŭih rvăt âk lơn. Yuh Bon Niêng K’Gut, tâm thôn 1, xã Đưng Knớ mbơh, rnơm tâm nthoi kan ma Caritas Đà Lạt, rmôt tanh njuh geh tay âk nŭih rvăt njuh ƀư nah bŭt, ƀư dŏng tâm rnăk vâl đŏng...Yuh hôm pơk êng jrâu ntĭm tanh gay ntĭm nti tâm ngih gay geh tay nŭih tanh njuh, tăch:

            ‘Gâp ŭch ƀư ân ueh, rêng tât ăp bu druh êng đŏng, rgop nau ƀư ueh nau ndâk nau ơm ueh bah rnoi nơm. Hŏ pơk jrâu ntĭm nti tă bah năm e, pơk 15 nŭih ri 5 nŭih rnôk aơ hŏ blau tanh ndrel geh tăch. Êp Caritas hăn nsum kơl njêng du rmôt ma gâp ƀư. Geh nŭih nhom brai, geh nŭih têk brai, geh nŭih ƀư ndơ aơ ndơ êng gay ma âk ntil ndơ, tâm di ma ntŭk bu ŭch rvăt ma mô geh roh nau ơm bah rnoi nơm”.

            Tâm nkuăl jru Lạc Dương đah rlau 90% rnoh nŭih rnoi mpôl đê̆, rơh rlau aơ, xã Đưng Knớ ndơn geh âk nau kơl an ntuh kơl bah Đảng ndrel Ngih dak, ndâk ntŭk ntu gung trong, ngih vâl, điện, ngih săm ƀŭt, ngih dak si. Lạc dương mbơh nau kan ndâk ƀon văn hoá pâl n’aih nsum ndrel ma hun hao pâl n’aih tâm nkuăl.

            Wa Phi Srônh K’Ham, Kruanh rmôt bu ur xã Đưng Knớ mbơh, ntơm bah nau rƀŏng bah nkuăl, rmôt bu ur bonh đă, rgum oh nur lŏ ƀư ueh nau tanh njuh, njêng ƀon ƀư pâl n’aih.

            ‘Ƀư ueh nau ơm yau bah rnoi nơm gay ma mât tay ân ăp rơh ba kơi ri ma ăp yuh ta aơ kŏ geh nti, geh ntĭm nau tanh, ndơ tanh geh ƀư ri hun hao ueh, n’hao nau geh dơi ân oh nur. Rnôk aơ geh nau kơl an, rmôt bu ur dôl rgum geh 20 yuh dôl ŭch manh prăk gay ma tanh njuh, du rnăk mang âk ngăn lah 50 rkeh”.

            Đah ăp nau rƀŏng kan n’hêl bah n’gâng kan nkuăl mpeh nau mât ndrel ƀư ueh nau ơm, âk bu ur rnoi K’ho tâm ƀon nkuăl jri Đưng Knớ dôl plŏ tay ma n’gâng juh, tanh jêng ăp ntil nah geh âk màu ueh, njêng ăp nah, ao tanh ueh tâm ban ma rnôk mhe tă bah njuh tanh bah nơm. Tanh njuh mô êng knŭng kơl an nŭih ƀon lan geh tay prăk, ma dôl njêng du ƀon văn hoá pâl n’aih nsum mpôl tâm nkuăl ƀon lan mhe./.