Bôk nau kan tâm n’ur đah ăp nŭih ntoh lư geh nau dơi tâm lam tahen mpeh nau ntĭm nti ndrel ƀư tĭng nau mĭn, nau rêh, nau kan Hồ Chí Minh; nsôih rdâng nau ƀư êng nơm tâm rnôk mhe.

            Ăp nau nkoch ueh mpeh nuih n’hâm nsôih, gơih njêng nau kan yor ƀon lan, yor nau kan bah neh dak, yor nau kan lam ntur neh bah ăp nŭih tahen geh nkra ƀư bah ăp phóng sự, nau njroh mprơ ndrel ăp nau tâm mbơh bah rnôk tâm n’ur kơl an ƀon lan gĭt kloh lơn mpeh nau ueh bah Tahen Wa Hồ; tă bah nê ƀư rêng ăp nau kan mhe, nau kan ueh, blau mhe, săk tam tâm lam ƀon lan.

            Ngoai tâm rhiăng nŭih ntoh lư ueh nau kan, nê lah Thượng uý Nguyễn Tuấn Anh, công ty An ninh mạng, Viettel, nŭih gơih mĭn, joi hŏ mbơh tâm lam ntur neh rlau 600 nau mpơl tâm nau mpôn, kơl an ăp ntŭk, ăp rmôt kan công ty têh, der ăp nau roh hoach mpeh tơm prăk geh rnơm ngăn. Thượng uý Nguyễn Tuấn Anh, nkoch:

            ‘Nau kan tơm bah gâp lah râng tâm rmôt Redteam geh nau ƀư kơt lah du hacker gay ma joi luh ăp nau ê dơi tâm nau mât mpôn tă bah bah dih ndrel tâm ntrong bah ntrong kan bah ăp công ty, ntŭk kan, ndrel tă bah nê joi luh ăp nau kan gay ma rklaih ăp nau mpơl nê. Gâp ndrel ăp nŭih kan nsum bah nơm mro nsôih ƀư đah ăp nau kan, kŏ ân geh nsôih mô rlu rlet ăp nau tât gay ma dơi geh ƀư ueh blau nau kan, rgop nau mât kơl ƀon lan, neh dak tâm trong mạng”.

            Bôk nau kan hôm geh nau râng bah nŭih ƀon lan rnoi mpôl đê̆, lĕ 5 nŭih tâm ngih sa sêt khih dôl ma tât khuch, rnôk hăn tât ngih dak si ngai ir. Bah năp nê, nau dak si tahen đah ăp nau kan, nsôih kơl rêh lĕ ma rnăk vâl. Nŭih ƀon lan nê hŏ leo n’ăp ma ŭch ndrel nau nkah gĭt bah nuih n’hâm tât nkoch tâm bôk nau tâm mâp aơ:

            ‘Gâp lah ueh ăp nai dak si âk ngăn, rnơm geh nai dak si ma ngih hên dơi rklaih khĭt, tât rnôk aơ geh ueh lăng. Tât đah bôk nau kan nar aơ, rnăk hên geh nklâm ndơ ŭch ân ma ăp nai dak si. Gâp ndrel rnăk vâl ân ma ăp nai ndrel ŭch mbơh ma ăp nai ntơm bah jêh dơi năl sêt khih, sêt sa”.

            Đah nau ƀư jŏ tâm 90 mnĭt, bôk nau kan ntoh rup sŏng tâm n’ur ăp nŭih ntoh lư “Ang nau ueh tahen Wa Hồ” lah nau tâm rgop tă bah ăp nau nkoch ueh ngăn bah nŭih tâm n’ur, tâm nê geh ăp nau nkoch rơh bôk năp geh mbơh, ndrel ma ăp phóng sự nkoch đah nau kan mhe, ueh, njêng nau ŭch ân nŭih uănh, geh nsum ma nau njroh mprơ geh ndâk nkra nâp, ueh, tâm rgop ma nau nkoch mbơh, bah nê kơl an ƀon lan gĭt kloh lơn tay mpeh Wa Hồ; rgop nau rêng ăp nau kan mhe, nau ƀư blau, săk tam tâm lam tahen.

            Uỷ viên Bộ chính trị, Kruanh Ban Tuyên giáo Trung ương Nguyễn Trọng Nghĩa, mbơh, ntơm năm 2021, Quân uỷ Trung ương hŏ ntrŭnh nau mpeh ƀư tĭng ueh nuih n’hâm “Tahen Wa Hồ”, nsôih rdâng nau ƀư mĭn ntrong kan êng du hê tâm nau kan mhe. Ntơm bah rđau nau nê, tât rnôk aơ tahen nơm nơm lơn ma têh dăng ăp ntil, n’ăp ma nau kan ntĭm nti, mra tâm lơh, pah kan jan sa. Nau kan bah tahen tâm rnôk kan ndrel ngăn lah nuih n’hâm bah tahen Wa Hồ lơn ma geh ntul rlong, nar lơn ma ntoh ang tâm ăp nau kan, n’ăp ma nau mât neh dak, kŏ kơt lah rdâng nau tât trôk nar lơh, srê ji. Ndrel tahen mra khĭt săk gay ma mât neh dak, nau ueh lăng, n’hâm soan ân ƀon lan. Mra dơi lah, nau ntrŭnh bah Quân uỷ Trung ương mpeh ƀư ueh tĭng nuih n’hâm Wa Hồ, nsôih njrăng rdâng nau ƀư mĭn kan êng tâm rnôk mhe lah nau ntrŭnh khlay, ndal, rgop nau ndâk tahen nâp nâp mpeh chính trị, n’hao nau nâp rgum nsum, n’hâm tâm lơh, ƀư jêh ăp nau kan geh jao./.