Kêng măng 4/7 UBND n’gor Dak Lak ƀư n’gul gâl trong kan rgâl mrô 6 khay bôk năm 2024, djôt dơn trong kan rgâl mrô ta n’gor dơi geh âk săk rnglăy khlay. Lam n’gor Dak Lak lĕ ndâk ƀư 1.000 rmôt công nghệ mrô ntŭk gŭ rêh ta ăp thôn ƀon, tổ dân phố đah rlău 7.200 nuĭh. Tâm rnoh 25 rnoh ndơ ƀư dŭt âk mpeh rgâl mrô, geh 16 rnoh ndơ ƀư geh lôch jêh bah năp trong nchrăp. Dôl uănh tât, nău hun hao wăng sa mrô n’hanh nău rêh jêng mrô dơi Dak Lak ƀư săk rnglăy.

Tât aƀaơ, lam n’gor geh rlău 1.700 ndơ ta ntŭk tăch tâm điện tử; geh bơi 43.000 ntŭk tăch ta ndrơng ndơ điện tử, dâl tal 5 lam dak. Bah meng ăp săk rnglăy uĕh, trong kan rgâl mrô bah Dak Lak hôm e du đêt nău mô hŏ dơi ƀư kơt hun hao ntung trong ta nkual jru ngai hôm e âk jêr jŏt; ngih wâl, ntung trong rhŏ an kơt dŏng rgâl mrô ta du đêt ntŭk, n’gâng kan nău kan, gưl nkuăl, gưl xă jŭr djơh, mô tâm ban.