Thiếu tá Vũ Hồng Hiến, Kruanh rmôt K51 mbơh, ntŭk rgum nting tahen khĭt tâm neh Campchia vay lah yôk prêh, trong jêr, ngăn lah trong hăn jâng, geh ntŭk ri knŭng dơi hăn ma dak me. Êp nê, ăp ndơ ndjôt ma ty, ăp tahen vay leo ndơ sa tŏng ân 7-10 nar. Tâm rnôk hăn joi, geh âk rnôk hăn mô geh saơ, yơn kŏ geh rnôk nkre saơ môch, nkre geh saơ âk ndơ đŏng:

‘Hăn êng, di rmôt ri hăn 2,3 nŭih oh nô. Rnôk nơm kuih kuai, saơ geh ndơ kât tâm săk ăp bah nô ri nơm kuăl bu. Aơ hôm, ăp wa aơ hôm. Rnôk nơm saơ geh kơt nê ri nkre rhơn nkre ngot ngăn, mô dơi ma nkoch. Ngăn lah rnôk hăn joi môch bah ăp wa nê, geh wa ri knŭng hôm neh lêk, hôm geh du đê̆ nŭih ri mô hôm du ntil ndơ, knŭng tâm nê lah play nut ao mô lah ndơ geh ndjôt. Nê lah nau ma nơm saơ ngot ji ngăn”.

Ndrel ma ăp nau kan rgum, joi, leo nsĭt môch tahen khĭt, cán bộ, tahen Rmôt K51 Dak Lak hôm ƀư ueh nau kan bonh đă tâm ntŭk nơm tât ndrle nau kan tâm nchră tahen, nchră nau ma n’gâng kan, ƀư ueh nau tâm boh ma ƀon lan dak băl. Ăp nô vay kơl an ƀon lan dak balư, kơl bu hăn tâm ro, chop khâl, pă ndơ, khám săm ji ndrel pă dak si ân kônh wa. Tă bah nê, âk nŭih mbơh ân Rmôt kan âk nau khlay. Thiếu tá Nguyễn Văn Duẩn, nŭih bah Rmôt K51 nkoch:

 ‘Nŭih ƀon lan tâm dăch ma nơm ri bu nkoch, bu kơl âk ngăn, âk rnôk bu hôm bonh đă băl mpôl ndrel râng hăn joi ndrel kơl an Rmôt gay ma joi saơ nting bah tahen nơm tâm neh dak Campuchia, ndrel rnôk sĭt ri bu hôm klâng đŏng. Rnôk nê tât ri bu uănh kơt lah băl mpôn, kơt lah kăl e lah tahen Wa Hồ tât hăn kơl an rnoi Khơ mer rklaih bah phung Pôl pôt”.

Rmôt K51 geh nau joi, rgum nting tahen khĭt tâm 4 nkuăl: Bát-chan-đa, Cô-nhét, Keo-sa-ma, Ô-răng, ndrel nkuăl ƀon têh Sen-mô-nô-rum n’gor Mul-đul-kri (Campuchia). Aơ lah n’gor yôk, hvi, trong hăn jêr, mih nar mô ueh. Thượng tá Trịnh Ngọc Kiệm, Kruanh rmôt K51 mbơh, knŭng lah tăng nau mbơh, bol ma ngai ma rhiăng km kđôi, Rmôt kan kŏ nsôih ma hăn đŏng:

  ‘Ntŭk geh nau mbơh ri tahen geh tât bah ăp tahen, đah ăp ntrong rlet nau jêr, gay ma uănh năl, joi, rgum ndrel rklaih nau. Rnôk saơ, rnôk joi, lah saơ ndoh ndơ bah ăp tahen ri ăp nau lêt rgănh, ăp nau jêr jŏt kơt lah geh ntop ueh lơn”.

Tâm rnôk 23 năm nsôih joi ăp tahen tâm dak băl Campuchia bah rmôt kan 51 hŏ leo geh 746 nting tahen khĭt kăl e sĭt neh me Việt Nam. Wa H’Yim Kđoh, Groi Kruanh UBND n’gor Dak Lak lah rjăp, ăp nau nsôih ndrel nau tă geh dơi bah rơh rlau aơ bah Rmôt K51 hŏ rgop nau âk ngăn ƀư huch oi ăp nau roh hoach đah băl mpôl ăp rnăk tahen khĭt, ntoh nau khlay ueh ngăn ngên:

 ‘Ntô̆ n’hao ngăn ndrel ryơk ngăn ăp nau nsôih bah ăp nô oh. Gâp rhơn lah, đah nau kơl an âk ngăn tă bah n’gor uỷ, HĐND, UBND, Uỷ ban MTTQ Việt Nam n’gor ndrel ngăn lah ăp nau ŭch rŏng ngăn jri bah ăp rnoi mpôl tâm n’gor ân an cán bộ tahen Rmôt K51 mô knŭng lah nau ŭch rŏng, nau rnơm ma rlau ma nê lah nau kâp rnơm gay khân păng ƀư ân jêh nau kan ueh khlay ngăn tâm neh dak băl”.

 Đah nau kan prêh khlay, ăp tahen bah Rmôt K51 Dak Lak rlet ăp nau jêr. Ăp nau kan mpôn êng, geh âk nau jêr, yơn dŭt n’hâm geh nau khlay bah cán bộ, tahen Rmôt K51 geh n’ăp ma dak rhal ndrel ăp rnôk rŭng dak măt rhơn rnôk geh joi saơ nting bah ăp nô, ăp wa gay ma leo nsĭt tâm neh me nơm./.