Kŏ tâm kêng măng 30/6, ta Thủ đô Seoul, Hàn Quốc, Thủ tướng Chính phủ Phạm Minh Chính hŏ geh rnôk tâm mâp đah ăp nŭih băl Hàn Quốc. Ntoh nau tâm nar mâp, Thủ tướng Phạm Minh Chính ntoh nau rhơn rnôk geh mâp ăp nŭih băl tâm dăch, tâm dơh ngăn bah ƀon lan Việt Nam, ăp nŭih hŏ ndơn, răk rong ndrel mô rlu rgop, kơl an ân nau tâm boh kan nsum bar dak Việt Nam-Hàn Quốc tâm rlau 30 năm ma aơ. Ntoh măt Chính phủ, Thủ tướng lah ueh ăp ntŭk ka, nŭih, ăp nŭih băl Hàn Quốc yor nau ŭch rŏng, nau rnơm ndrel ăp nau nsôih ân an Việt Nam;

Nkre lah rjăp nau rŭng rŏng, nau ryơk bah ƀon kan Việt Nam, rmôt kan ntoh măt bah Việt Nam đah neh dak, ƀon lan Hàn Quốc, Thủ tướng lah rjăp, Đảng, Ngih dak Việt Nam dŭt n’hâm uănh khlay nau tâm boh ma Hàn Quốc. Tâm nau dơi tâm ban ƀư ntrong tâm nchră êng, đăp mpăn, ƀư tơm, nâp nâl, tâm boh ndrel hun hao, âk dĭng, âk nau kan, Việt Nam uănh khlay nau tâm boh ma Hàn Quốc ndrel ŭch leo nau tâm boh bar dak lŏ geh hun hao ueh, săk tam ndrel jŏ jong tâm ban ma nau tâm boh kan nsum ăp ntil./.