Nău nkoch ntuh kơl trong cao tốc an Tây Nguyên lah ngoăy tâm ăp nkô̆ nău dơi nuĭh ƀon lan êng uănh khlay tâm ăp rơh mâp cử tri bah Mpôl đại biểu Quốc hội n’gor Dak Nông ƀư nar ntri (1/7).

Na nê̆, Mpôl đại biểu Quốc hội n’gor Dak Nông hŏ ƀư 2 rơh mâp cử tri ta ăp xã Trường Xuân (nkuâl Đắk Song), xã Đắk Som (nkuâl Đắk Glong), mbơh mpeh lôch jêh Rơh hop tâl 7, Quốc hội khóa XV. Lơn lah tâm rơh hop mhe aơ, Quốc hội hŏ uănh an dŏng nghị quyết mpeh trong nchrăp ntuh kơl ƀư trong cao tốc Bắc - Nam mpeh nhâp nar gâl hăn rlău Gia Nghĩa (Dak Nông) - Chơn Thành (Bình Phước) đah rnoh jong nklăp 128,8km, lĕ rngôch rnoh ntuh kơl 25.540 rmen prăk. Âk cử tri mpŏng ơm ƀư, gay trong cao tốc jêng ngăn ngăn, tŏng geh trong rsong hăn, tăch rgâl, n’hanh kơl nuĭh ƀon lan dơh tât ăp ntŭk but săm ji gưl bah lơ.