Ôi aơ 29/6, Quốc hội mbra hop mpôch dŭt, n’hơr ti uănh an dŏng âk trong nchrăp luật, nghị quyết, tâm nê geh nkô̆ tĭng ƀư rgâl n’hao prăk khay.  Tĭng bôk nău kan ôi aơ, Quốc hội n’hơr ti uănh an dŏng 2 trong nchrăp luật, lah: Luật Bảo hiểm xã hội (rgâl nkra); Luật Mât, dŏng ndrak nsiu rtoh  n’hanh ndơ rnă săk (rgâl nkra); Luật rgâl nkra, kơi ntop du đêt nkô̆ bah Luật neh ntu, Luật Jay gŭ, Luật tăch rgâl neh ntu, Luật ăp mpôl kan an manh prăk.

Quốc hội n’hơr ti uănh an dŏng Nghị quyết mpeh lôch jêh groi nđôi way nkô̆ “nău tĭng ƀư Nghị quyết bah Quốc hội mpeh trong kan năm dŏng prăk kaih, prăk ntop kơl dâk hao tay, hun hao wăng sa- rêh jêng kon nuĭh n’hanh ăp nghị quyết bah Quốc hội mpeh du đêt trong nchrăp kan khlay gưl neh dak tât năm 2023”; Nghị quyết mpeh ôp n’hanh ơh nău ôp. Bah meng nê lah Nghị quyết Rơh hop tâl 7, Quốc hội khóa XV (tâm nê geh nkô̆ mpeh nău rgâl trong nchrăp ntuh kơl bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang lvang năm 2021 -2030; hŭch rnoh prăk sŏk soăy kơi ntop  n’hao tay; tĭng ƀư rgâl n’hao prăk khay;  trong njong rnon  đah rnoh prăk plơ̆ kơl tay tơm prăk n’hanh du đêt nkô̆ geh tât nău dŏng tơm n’hao sŏk geh prăk  ngân sách trung ương năm 2023). Kruanh Quốc hội Trần Thanh Mẫn lah n’glôch jêh rơh hop tâl 7.