Mât ndray, ntik n’hao rnoh khlay văn hóa way ơm ăp rnoi mpôl đê̆ nkre đah hun hao pâl nđaih lah rnoh tât kan ma nkual ƀon têh Buôn Ma Thuột, n’gor Dak Lak ndơ̆ luh gay tĭng ƀư geh nău tam pah kan rnoi mpôl đê̆ n’hanh trong kơl rnoi mpôl đê̆ tâm 5 năm tât. Ntŭk rgum tơm bah pah kan rnoi mpôl đê̆ ta nkual ƀon têh Buôn Ma Thuột lah nău mât ndray n’hanh ntik n’hao ăk tơm văn hóa ăp rnoi mpôl đê̆ nkre đah hun hao pâl nđaih.

Âk ƀon lan dôl mbrơi jêng ăp rmôt nuĭh blău njroh mprơ, rdâk tay ăp nău kan way ơm, rdâk njêng, nkra têh uĕh tay ăp jay way ơm jêng ăp homestay, ntŭk rgum hăn uănh pâl rhŏ dŏng an năch pâl nđaih. Wa Trần Đức Nhật, Groi Kruanh UBND nkual ƀon têh Buôn Ma Thuột an gĭt, đah trong rƀŏng rdâk njêng Buôn Ma Thuột jêng nkual ƀon têh nđĭr uĕh- âk ndơ gŭ rêh- săk tơm, nkual ƀon têh ntik n’hao săk tơm ndơ ntuh kơl hun hao wăng sa rêh jêng kon nuĭh ăp ƀon lan du trong jŏ jong, rgŏ jă kônh wa ntĭk suan dăng nơm, tâm rnglăp tâm kơl nsum gay đăp mpăn mât ndray ăp rnoh khlay way ơm uĕh lăng, njêng jâng văn hóa âk săk ntơr, ntrŭt ntrôl hun hao pâl nđaih.