Jêh âk tŏ ƀư nkoch tâm Nkuăl ƀon têh Buôn Ma Thuột ndrel ăp nkuăl tâm n’gor Dak Lak, mhe aơ, ca kịch “Nau mpŏng Dam Săn” hŏ geh mbơh bah năp nŭih uănh ndrel ăp nŭih ŭch ma nghệ thuật tâm nkuăl ƀon têh Hồ Chí Minh. Nau nkoch tâm ơh yor Nhạc sĩ Nguyễn Cường ndrĭng nsing tâm sử thi Dam Săn bah rnoi Rđe, nkoch tât bu janh dăng Dam Săn đah nau ŭch ndâk ƀon lan ndrel mât rnoi nơm nâp dăng. Bu ndăm Dam Săn hŏ ƀư nau ŭch rŏng lơn bah Brah nar, leo nau ang ân ƀon lan, mpoh ân chông ŭnh tâm rŏng ndrel nau rêh tâm nkuăl tôk prêh nâp nâl. Wa Lưu Thị Hoa, tâm nkuăl ƀon têh Hồ Chí Minh, nkoch:

            ‘Rơh bôk năp gâp uănh ca kịch Nau mpŏng Dam Săn, gâp saơ ueh ngăn. Ntơm nơh gâp uănh âk ngăn cải lương, ca kịch yơn lah ê mâp saơ geh du vở kịch ma ueh ngăn ngên ngăn kơt nê. Nŭih jang dăng bah rnoi Dam Săn geh nau tâm rŏng, geh n’hâm rêh dăng jang, dŭt dăng jang ngăn ndrel hŏ trêng lam neh tay gay ma ăp nŭih ƀon lan kơt tĭng”.

            Nau tâm ơh yor ăp nŭih ƀư bah Rmôt ăp nŭih ƀư nau njroh mprơ rnoi mpôl Dak Lak ƀư. Tâm nê, nŭih njêng bu ndăm Dam Săn lah Nghệ sĩ ưu tú Y Joel Knul ndrel ƀư ơh ân H’Nhí (ur Dam Săn) lah ur păng nơm, ca zĩ H’Lueng Niê ƀư.

            Nghệ sĩ ưu tú Y’Joel Knul nkoch, ntơm bah jê̆ nô geh u che mprơ nkoch mpeh nau ơm ndrel păng ŭch ngăn ma bu ndăm Dăm Săn yor lah geh nuih n’hâm dăng, blau kơl an ƀon lan. Yor ri, rnôk geh râng nau nkoch mbơh nau kơt aơ, nô saơ rhơn ngăn ngên. Ăp rnôk hăn ƀư nau nê, bol ma rnôk dôl ma tĭng nti, nô kŏ geh nau ueh tâm nuih n’hâm nơm. Kơt lah ăp nau khlay ơm bah che mbŏ nơm hŏ lăp ngăn tâm săk jăn dak mham:

            ‘Gâp ƀư ơh nau jêng Dăm Săn, geh âk ntŭk gâp saơ geh nau ŭch ngăn ngên, yor lah kơt lah nơm geh lăp ngăn tâm nau rêh bah nŭih ma nơm njêng nê, nau rêh bah nŭih nê. Saơ ăp nau roh hoach nê, rnôk nơm yor ty kŏ saơ geh nau m’ak tâm nuih n’hâm, rnôk ma H’Nhi ut ndrel kăp ty Dam Săn ri gâp ŭch ngăn ngên, rngot tât luh dak măt. Rup gui nê păng nơih dơm, yơn lah mô geh nau nơih ôh, nê lah nau jru ueh. Nkô̆ bah nau tâm ơh aơ bah nhạc sĩ Nguyễn Cường sŏk tă bah “Khan Dam San” geh nau ƀư ueh ngăn tât nau njroh mprơ ngơi”.

            Tĭng Nghệ sĩ ưu tú Y’Joel Knul, bôk năp nau njêng ƀư Dăm Săn geh jao ân nŭih êng. Yơn tâm rnôk tâm mâp ndrel rlong ƀư, nhạc sĩ Nguyễn Cường hŏ săch nô ƀư njêng nŭih aơ. Păng lah xa sĩ nkre lah nŭih nkreh đơn, rnôk ndơn ma nau ƀư ca kịch, nô nsôih tĭng kơt nti âk ngăn. Ndri ma, rnôk nau tâm ơh ngơi Nau mpŏng Dam Săn geh ƀư ngăn ndrel geh âk nŭih ndơn, ŭch rŏng ri nê lah du nau khlay ngăn tâm nau rêh nau kan bah nô.

            Tâm bơi tât 25 năm ƀư nau kan njroh mprơ ndrel lôch 15 năm tâm dăch ma mrôt Njroh mprơ rnoi mpôl Dak Lak, Nghệ sĩ ưu tú Y’Joel Knul hŏ geh âk nau dơi, nsĭt âk huy chương, nau nkhôm tâm ăp rnôk tâm rlong tâm ndrel bah dih dak. Ntoh ngăn kơt Huy chương Bạc năm 2019 ndrel Huy chương Vàng năm 2022 tâm Liên hoan Âm nhạc ASEAN, Huy chương Bạc Liên hoan njroh mprơ tâm lam dak năm 2021...Yuh H’Su-yn Byă, tâm nkuăl ƀon têh Buôn Ma Thuột, n’gor Dak Lak, ngơi:

            ‘Nghệ sĩ ưu tú Y’Joel hŏ leo tât ăp nau mprơ, ăp nau ueh bah er rnoi Rđe, ăp nau mprơ bah nô ueh ngăn ngên, geh âk nŭih gĭt tât. Dŭt ŭch nô mra dơi geh leo âk nau mprơ, ăp nau mprơ lơn ma ueh, lơn ma khlay lơn tât đah nŭih uănh”.

            Wa Nguyễn Thuỵ Phương Hiếu, Groi Giám đốc Sở Văn hoá-Thể thao ndrel Pâl n’aih Dak Lak mbơh, nghệ sĩ Y’Joel Knul geh nkhôm Nghệ sĩ ưu tú ntơm năm 2015, rnôk păng 40 năm, rnôk nê lah nŭih mom ngăn tâm rnoh 4 nŭih nghệ sĩ ưu tú tâm n’gor.

Mô knŭng geh nau mprơ ueh, er bah Tây Nguyên, Nghệ sĩ ưu tú Y’Joel Knul hôm bư nau kan rjăp, ŭch, nsôih kơt tĭng geh nau blau ngăn. Rnôk aơ, ngjệ sĩ Y’Joel hŏ rgum âk nau dơi, ndri ma, Sở dôl ƀư jêh hồ sơ đă Ngih dak kơp dơn nau dơi Nghệ sĩ Nhân dân:

            ‘Nghệ sĩ ưu tú Y’Joel Knul kŏ nsôih ngăn ƀư ân ueh tâm ban lĕ săk nơm tâm nau mprơ, tâm nê geh ăp nau kan bah Rmôt kan njroh mprơ rnoi mpôl bah n’gor, ndrel ma rmôt kan nơm ndâk du rmôt nŭih tâm rnglăp ndrel nar lơn ma hun hao. N’gâng kan kŏ pơk trong nơih gay Nghệ sĩ ưu tú Y’Joel Knul geh râng ntĭm nti gay ma dơi geh ăp nau dơi prêh lơn, ntip nau dơi geh kơp dơn Nghệ sĩ Nhân dân êp tât”.

            Đah ăp nau nsôih ndrel nau rjăp tâm nau kan, Nghệ sĩ ưu tú Y’Joel Knul hŏ ndrel dôl geh ăp nau dơi tâm nau kan njroh mprơ, ndơn geh nau ŭch rŏng bah âk nŭih. Ndrel ma nau mprơ, rnôk aơ nô dôl ŭch ăp nau mhe tâm nau kan âm nhạc Tây Nguyên ndrel nau njroh mprơ đah nau ŭch rgum ndrel ƀư mhe ăp nau mprơ bah Tây Nguyên, njêng du nau mprơ ueh mhe kơl ân nŭih ŭch djăt uănh./.