Tổ dân phố 8, Phường Tân Tiến, nkuăl ƀon têh Buôn Ma Thuột, n’gor Dak Lak geh 62 đảng viên. Wa Vũ Thị Huê-Bí thư chi bộ mbơh: Ntơm bah năm 2019 tât rnôk aơ, du năm chi bộ rnglăp ntơm 2 tât 3 đảng viên. Êng tâm n’gul bôk năm 2024 hŏ rnglăp geh 3 đảng viên. Ăp đảng viên mhe kŏ geh lôch nti ntơm jrâu 9 hao gŏ lơ, geh nau mĭn nâp, năm mom. 5 năm mro, chi bộ geh Đảng bộ Phường Tân Tiến dăp chi bộ ƀư jêh nau kan. Wa Vũ Thị Huê ngơi:

            ‘Phung hên jao nkô̆ nau 7 rmôt kan tâm tổ dân phố, ăp khối ân hun hao mbơh mhe du hê nŭih geh nau blau gay ma ân lăp đảng. Ăp oh đoàn viên săk khân păng ân geh nsôih ri rmôt phung hên uănh. Lah saơ geh nau ueh mpeh ăp ding ri đă hăn nti jrâu nti nau gĭt mpeh Đảng ndrel jêh nê ân lăp”.

            Nô Phan Thành Tiến, lah đảng viên mom mhe geh rnglăp tâm chi bộ Tổ dân phố 8 tâm bôk khay 5 năm 2024 mhe rlau. Nô Tiến nkoch, ntơm bah rnôk hôm lah sinh viên, gĭt mpeh nau ntrŭnh bah Đảng ndrel nsôih ân geh lăp Đảng. Jêh rnôk lôch nti đại gọc sĭt pah kan tâm Phường Tân Tiến, nô lŏ nsôih, chiăr nti, mro ƀư jêh ăp nau kan geh jao, nsôih râng nau kan bah nkuăl. Lơ 8/5 mhe rlau, nô geh lah 1 tâm 2 nŭih mom geh lăp Đảng. Nô Tiến nkoch:

            ‘Bah rnôk pah kan tâm ntŭk kan, gâp mro ƀư tĭng ăp nau ntrŭnh đă, ndrel nsôih mô rlu tâm nau kan. Ntơm bah nê, rđau kan ntŭk kan pơk trong nơih ân gâp ntĭm nti nau gĭt blau mpeh Đảng, ndrel tât khay 5 năm 2024 gâp geh ân lăp Đảng”.

            Đảng bộ Phường Tân Tiến, Nkuăl ƀon têh Buôn Ma Thuột rnôk aơ geh 578 đảng viên, rƀŭn tâm 20 chi bộ tâm dâng, tâm nê 13 chi bộ Tổ dân phố, 4 chi bộ ngih săm ƀŭt ndrel ăp chi bộ công an, quân sự, dak si. Ăp năm rlau aơ, Đảng bộ phường mro ƀư ueh nau kan hun hao đảng viên mom, ndrel geh Đảng bộ nkuăl ƀon têh Buôn Ma Thuột rnê lah Đảng bộ nâp nâl nâl ăp ntil.

Tĭng wa Nguyễn Đình Ninh, Bí thư Đảng uỷ Phường Tân Tiến, năl kloh nau kan rnglăp đảng viên mom lah nau kan khlay, Đảng uỷ phường hŏ pă nau kan ân ăp nŭih tâm chi uỷ tâm nau kan aơ. Ăp chi uỷ ân ndâk nau nchrăp ngăn, n’hêl tâm nau săch, ntĭm nti ân nŭih blau. Ăp chi bộ kŏ ƀư ueh nau kan geh jao, mô lah âk chi bộ rlet nau nkô̆ nau dơi. Wa Nguyễn Đình Ninh nkoch tât nau blau tâm nau ntĭm, rnglăp đảng viên mom tâm Đảng bộ Phường Tân Tiến rnôk aơ:

            ‘Ăp công dân ma hăn nti lôch sĭt tâm nkuăl nơm ê geh dăn dơi nau kan, phung hên mra leo lăp tâm rmôt dân quân tự vệ mô lah đoàn viên druh ndăm gay ma uănh, kơl an, gay khân păng nsôih râng ƀư ăp nau kan ân nkuăl. Ntơm bah nê, phung hên mra săch ăp nŭih blau, đoàn viên blau gay geh nŭih ân nglăp đảng”.

            Nau ngăn ân saơ, nau kan hun hao Đảng tâm Phường Tân Tiến, nkuăl ƀon têh Buôn Ma Thuột hŏ ƀư geh tâm ban, săk tam. Bah nê, ƀư ueh nau kan tơm bah chi bộ đảng tâm dâng, rgop nau hun hao văng sa, rêh jêng ndrel ndâk Đảng bộ Phường Tân Tiến nar lơn ma nâp nâl ăp ntil./.