Đah dŭt âk đại biểu tâm ban ŭch, Quốc hội lĕ mbơh tơih Luật hăn trong neh n’hanh Luật mât đăp mpăn hăn trong neh. Ta năp ăp nău tâm rgop êng êng mpeh khoản 2, Điều 9, ntrŭnh mpeh rnoh côl tâm săk bâh nuĭh ƀĭt neh. Quốc hội lĕ tâm rgop tâm ban ŭch êng mpeh nău aơ.

Nău geh tâm rgop, dŭt âk đại biểu lĕ tâm ban ŭch đah nău ntrŭnh. Mô an ƀĭt ndeh hăn trong ndeh ma tâm săk mham n’hanh nsôr n’hâm geh rnoh côl. Bâh nău ngăn mông nar ba năp nơh geh ăp oh kon se geh chuêl tâm ndeh rnôk vơt njŭn hăn nti, jêng tât dŭt nđach. Ủy ban rnâng kan QH lĕ đă QH ntop tay du đê̆ nău ntrŭnh mhe tâm Luật mât đăp mpăn hăn trong  neh lah ndeh ô tô rdeng kon hoc hăn nti, oh kon se mầm non mô lah ndeh ô tô rdeng ndơ tâm rgop đah pah kan njŭn ndơ̆ vơt kon hoc , mầm non an geh sŏk rup kon hoc, mầm non n’hanh ndơ geh mbơh njrăng chuêl oh kon se ta ndeh.