Lơ 27/6, Thủ tướng Chính phủ Phạm Minh Chính ndrel mpôl đại biểu gưl prêh Việt Nam lĕ lôch uĕh rơh pah kan râng Rƀŭn nchră WEF Đại Liên n’hanh pah kan ta Trung Quốc. Ta Rƀŭn nchră WEF Đại Liên, đah ntoh lư lah nău ntoh ngơi khlay ta Rơh ntơm ƀư lĕ rngôch, ta năp nklăp 1.700 bu năch jă bah 80 dak, Thủ tướng Chính phủ lĕ nkoch nău ŭch nđơr bah Việt Nam mpeh Rgâl mhe, rgum lăp nsum n’hanh hun hao.

Thủ tướng Chính phủ njuăl ăp nău mbơh jru, na nê̆ mpeh ăp nău geh ntoh lư mpeh wăng sa-rêh jêng, mpeh nău ntrŭnh, trong uănh, nău rƀŏng têh hun hao neh dak bah Đảng, Ngih dak Việt Nam. Tâm rơh pah kan, Thủ tướng Phạm MInh Chính lĕ geh bôk nău ƀư ăp ding dŭt n’hâm uĕh, geh rgum ôp, rgum nchră đah Tổng Bí thư, Kruanh dak Trung Quốc Tập Cận Bình, Thủ tướng Quốc vụ viện Lý Cường, Kruanh Chính hiệp lam dak Vương Hộ Ninh; ndrel Ủy viên Bộ Chính trị, Groi Thủ tướng Quốc vụ viện Trung Quốc Trương Quốc Thanh râng n’hanh ntoh ngơi ta “Rƀŭn nchră kan ndrel Việt Nam-Trung Quốc mpeh hun hao ntung trong n’hanh nău ƀư tơm bah doanh nghiệp Việt Nam-Trung Quốc.