Ôi 27/6, ta Bắc Kinh, tâm rnôk hăn pah kan râng Rƀŭn nchră wăng sa lam ntŭr neh Đại liên n’hanh pah kan ta Trung Quốc, Thủ tướng Chính phủ Phạm Minh Chính wơt Ủy viên Bộ chính trị, Groi Thủ tướng Quốc vụ viện Trung Quốc Trương Quốc Thanh. Ta nar wơt, 2 ding an lah, Rƀŭn nchră geh nkô̆ nău khlay gay mbơh ƀư tay, na nê̆ tâm wât ndrel gưl prêh, ăp trong nchrŏng ntĭm rđău trong kan bah Tổng Bí thư Nguyễn Phú Trọng n’hanh Tổng Bí thư, Kruanh dak Trung Quốc Tập Cận Bình, ngăn lah nău mbơh nsum Việt Nam-Trung Quốc mpeh nău ƀư jru n’hanh n’hao tâm boh ka ndrel têh lam hvi, ndâk njêng Nsum mpôl nkoch tâm rgŏ năp Việt Nam-Trung Quốc geh nkô̆ nău têh hvi tĭng trong rƀŏng “6 rlău”.

Thủ tướng Phạm Minh Chính lah rjăp, tâm dŭt âk nău kan an ƀư an nê̆ n’hao nău wât gưl prêh, Nău mbơh nsum Việt Nam-Trung Quốc ri ntung trong lah nău kan mhe, di n’hanh geh nău rup ndah, geh nkô̆ nău khlay gay boăt nthoi nău kan 2 jâng wăng sa, boăt nthoi đah tâm trôm kan “2 ndring, 2 trong têh” bah Việt Nam đah Nău mĭn ƀư mhe “Vành đai n’hanh trong hăn” bah Trung Quốc. Thủ tướng đă ta năp măt, 2 ding rgum ntrôl kan ndrel mbơh ƀư 3 trong ndeh treng boăt nthoi Việt Nam-Trung Quốc (Lào Cai-Hà Nội-Hải Phòng; Lạng Sơn-Hà Nội; Móng Cái-Hạ Long-Hải Phòng)