Lễ hội ndơ ngêt sa “Bri dak dơn ngoăy” lah ntŭk rgum săk ntơr tâm ăp nău  kan mbah rhơn nkah ndray 49 năm rklaih luh niềm Nam, dơn ngoăy neh dak (30/4) ƀư ta Thảo Cầm Viên Sài Gòn năm aơ.

Wa Vũ Thị Hương Giang, Giám đốc Thảo Cầm Viên an gĭt: lễ hội rơh dja dơi ƀư đah rnoh  têh, lĕ rngôch 50 ndrơng ndơ nkơnh n’hơ 149 bánh way ơm bah pe mpeh neh dak, bah nê rgop nkoch n’hơ văn hóa ndơ sa âk ntil, ntĭt êng bah ăp nkual. Njăr trong joi gĭt ndơ sa Việt mbra dơi tâm pă ƀư jêng 3 nkual Huế - Sài Gòn – Hà Nội đah ăp ndơ bánh way ơm bah nkual neh cố đô Huế, mô lah ntŭk tăch ndơ sa khuh n’gôr bah Sài Gòn đah âk ndơ sa săk tơm miền Nam n’hanh rlong kah êng bah ăp bánh sa njŭng kah ntĭt êng bah thủ đô Hà Nội, ndrel âk ndơ sa kah khlay êng bah nkual neh Tây Nguyên. Bôk nău kan hôm geh nău tât râng bah ăp nuĭh kah blău ƀư, nchreng an uănh ƀư njêng du đêt ndơ sa way ơm Việt Nam. Lễ hội ndơ sa ntơm bah nar 26/4 tât 01/5.  Wa Vũ Thị Hương Giang an gĭt tay:

“Đah nkô̆ “Bri dak dơn ngoăy”, mpôl hên sŏk ntŭk rgum tơm bah lễ hội lah ndơ sa ân mpơl dơi nău ntĭt êng bah Bắc – Trung - Nam. Bôk  nău kan geh nău tât râng bah âk nuĭh gĭt blău way ơm  tâm ƀon lan, khân păng ƀư na nê̆ bánh ta ntŭk n’hanh nkoch mbơh an năch”