Ta trong pâl nđaih “Nău mpring nkoch bâh dak n’hanh ŭnh” bâh Công viên địa chất lam ntur neh UNESCO Dak Nông, ntŭk kan Nâm Nung lah ntŭk ntoh lư ntĭm nti nău way ơm cách mạng, ntŭk di sản kơl an năch ta trong kan sĭt tu tơm. Ta aơ geh nău ueh ơm mpeh neh ntu đah âk ntŭk dŭt ueh kơt lah leng rveh, leng lŭ, leng Dak Ntao, âk dak bât ơm geh dŭt ueh, ăp dak me hoch bâh ta bri krŏng..Ngăn lah, Nâm Nung lah ntŭk gŭ rêh bâh ƀon lan ăp Bunong ta ntŭk hôm nha geh mât rbăy âk nău ueh văn hóa rnoi nơm, tâm nĕ ăp ndơ sa way ơm kăl e dŭt ueh. Yơ H’Suych ta ƀon Jarah, xã Nâm Nung, nkuăl Krông Nô, n’gor Dak Nông mbơh tơih.

 “Ndơ sa way ơm bâh nuĭh Bunong he lah biăp nse, nkŭr djêl bên sa bâh u che kăl e hôm. ăp ndơ sa kơt lah m’êt prung, djăr gŭch, biăp prung lah ndơ sa ăp nar hôm. Ta rơh u che, mê̆ bơ̆ kanŭng rong kon sai ma ndơ sa aơ dơm. Kăl e nơh mô geh dak măm, mô geh ngi, ăp mê̆ ăp bơ̆ ƀư ndơ sa bâh ndơ ơm geh tâm bri gay ma geh ndơ sa an rnăk vâl nơm”.

Geh nău way ơm mpeh ăp nău nkoch mpeh văn hóa, geh ăp nău mpeh mih sial trôk nar, đah ăp kon nuĭh dăch bên rŏng năch, nkuăl Krông Nô, n’gor Dak Nông geh âk nău dơi gay ma ƀư pâl nđaih. Ta xã Nâm Nung, nkuăl Krông Nô, khay 8/2022, “rmôt pâl nđaih ta ntŭk rêh jêng Yôk Nâm Nung” geh njêng knơm ta nău tâm rgop ăp rnăk vâl ta 2 ƀon Yôk Ju n’hanh ƀon Ja Rah pơk trong hăn mhe, n’hao nău dơi pah kan an ƀon lan. Wa Y Thanh Ja ta ƀon Yôk Ju, xã Nâm Nung, Krông Nô lah nuĭh way bên ƀư ndơ sa dŭt ntoh lư đah mpang ti dŭt blău rnôk ƀư gâm ndơ sa kah ntoh lư bâh nuĭh Bunong. Lôch geh ƀư dông ndơ sa răk năch, nô nkoch.

 “Aơ lah ăp ndơ sa bâh nuĭh Bunong geh mbo gŭch, blân, play nông, rpŭng, rpoăl, m’êt prung, biăp prung, nkŭr djêl, djăr gŭch n’hanh kik gŭch...aơ lah ăp ndơ sa ăp nar bâh nuĭh Bunong”.

Rlong ăp ndơ sông sa kah bâh ăp ndơ sa bâh nuĭh Bunong ta ƀon lan, yor ăp nuĭh Bunong nơm nkret gâm, năch dŭt ŭch gĭt tu tơm ndơ geh sa n’hanh nău nkret ƀư. Aơ lah rơh nkhêp gay ma nô Y Thanh Ja mbơh tơih mpeh ăp nău ueh yor nău rêh kăl e bâh nuĭh Bunong nsĭt tay.

 “Ăp ndơ sa bâh nuĭh Bunong way geh sŏk bâh ndơ ơm geh tâm bri, tâm mir kơt ah biăp prung biăp nse n’hanh djêl, ndơ aơ dơh dơm ƀư, kanŭng geh dĭng nkar sŏng ueh mô ir kranh mô ir nsr, he tĕ lĕ ta ding kơt biăp, djêl tŏ dak ta dĭng n’hanh gŭch ta ŭnh rnga, kahgĭt plăch ƀa ƀơ an sĭn tâm ban, ndơ lĕ sĭn rĭ he sŭr an hăch lah geh ndơ sa kah hôm”.

Nău njêng “Rmôt pâl nđaih ntŭk rêh jêng Yôk Nâm Nung” ta xã Nâm Nung, nkuăl Krông Nô lĕ ntop ƀư ueh, dơh nơih lơn trong kan pâl nđaih “Nău nkoch mpring bâh dak n’hanh ŭnh” bâh Công viên địa chất lam ntur neh UNESCO Dak Nông. Yor nău kan aơ nkre kơl an năch geh gĭt vât âk nău mpeh si gle dak nor ueh, joi gĭt mpeh nău khlăy lịch sử cách mạng, nkre lah geh mât rbăy n’hao nău khlăy văn hóa ntoh lư bâh nuĭh Bunong, nkre lah njêng nău geh an ntŭk rêh jêng. “Nghệ nhân ƀư ndơ sa” Y Thanh Ja nkoch.

 “Mpôl hên ŭch mbơh tơih ăp ndơ sa aơ gay ma ăp băl dăch aơ geh gĭt tât nău ueh kah ndơ sa hên. Hên ŭch ăp ndơ sa aơ tâm rgop ndrel đah nău pâl nđaih ta ntŭk rêh jêng gay ma geh âk năch tât pâl rlưn n’hanh geh gĭt tât nău văn hóa ndơ sa hên. Mpôl hên dôl nsrôih tâm rgop ăp ndơ sa way ơm nkret ƀư tĭng trong mhe aƀaơ gay ma an ueh âk ndơ sa ta rnăk vâl n’hanh răk năch. nĕ lah nău ma hên mpŏng tât ga ma mât rbăy n’hanh mbơh tơih an bu gĭt ndơ sa hên”.

Tât ta Nâm Nung, Krông Nô ta trong hăn pâl ta công viên địa chất lam ntur neh UNESCO Dak Nông, năch geh uănh ăp ntŭk ueh đah si gle trôk nar dŭt ueh. Bâh ta bri krŏng, rnoh dak hoch bâh ta leng, geh âk dak lêng kơt Leng Kum, Leng Ông, Leng Gungtao...sĭt ta ƀon lan, năch mbra geh uănh âk ntŭk dŭt ueh bâh dâng lŏ ba dâng jâng yôk, geh gĭt ăp nău kan way ơm ngêt sông ăp ndơ sa way ơm ntoh lư bâh nuĭh Bunong.

 Chú thích ảnh:

-Cơm lam – gà nướng

- Cá suối gói lá rừng

          (Quốc Học - Thị Đoắt xử lý TĐ)