Ôi 8/11, UBND n’gor Gia Lai ƀư Ntơm pơk pơh lễ kao tăng-yôk ŭnh Chư Đăng Ya năm 2024. Lễ ntơm pơk ƀư dŭt têh uĕh đah nău tât râng bah rlău 100 nuĭh gĭt blău chĭng goh njroh mprơ rhơn wơt nuĭh tât râng n’hanh năch pâl nđaih. Ndrel đah ăp rmôt chĭng gong lah ăp rmôt múa xoang, múa rối, njêng săk săk tơm văn hóa bah rnoi nuĭh Jarai n’hanh Bahnar. 

Tâm jâng gung lễ hội, Mpôl tơm ƀư hôm ƀư âk ndrơng ndơ tăch nkah nsĭt, ndơ kah khlay ta ntŭk, ndơ geh ƀư tuch tăm ƀon lan ntoh lư kơt cà phê, tiêu, prit ju, ndrănh yăng, ƀăng kro, ka thát lát dak me Sê San; ăp ndơ tăch bah druh ndăm ntơm njêng nău kan, bu ur, ndơ geh ƀư bah ăp hợp tác xã tuch tăm ta nkuâl Chư Păh. Pơh lễ Kao tăng – Yôk ŭnh Chư Đăng Ya năm 2024 mbra ƀư tât lĕ nar 10/11. Ndrel đah joi uănh rup uĕh bah yôk ŭnh n’hanh săk kao tăng dang êr mprang, năch hŏ geh rnôk uănh saơ na nê̆ tanh sah, cheh tanh bok brai ndel ăp nuĭh blău, dơi pâl ăp ndơ pâl rlưn way ơm ta lễ hội kơt: Ntrôl mâng, ncho lơng djơng, têk rse, nsăt ƀao ƀô, hao yôk.