Măng 7/11, N’gâng kan Văn hóa Thể thao n’hanh Pâl nđaih Dak Lak ƀư tâm nđŭr nkoch trêng hăn ăp ntŭl gưl n’gor rơh tal 18, năm 2024. Đah bôk nău “Dak Lak-Mpŏch luh ang”, tâm nđŭr ƀư bah aƀaơ tât lĕ nar ôi taơ, 9/11, đah bơi 350 cán bộ nuĭh nkoch trêng bah 13 ntŭk kan nkuăl, nkual têh n’hanh nkual ƀon têh tâm n’gor Dak Lak râng.

Ndrel đah tâm rlong ndeh hăn nkoch trêng, ăp ntŭk kan mbra ƀư tĭng du bôk nău kan nkoch trêng tâm rgop đah nkô̆ nău rnê rhơn Đảng, Wa Hồ, nău rŏng ƀon tơm neh dak, nkoch trêng cách mạng bah tahen n’hanh ăp rnoi nuĭh, ăp nău geh ndâk njêng neh dak, n’hanh hun hao wăng sa-rêh jêng, mât njrăng bri dak-rnă njrăng, mât njrăng ƀư tơm n’har bri, gôl dak. Tâm nĕ, lah rjăp ăp nău geh tă bah rlău 120 năm n’gor Dak Lak têh jêng n’hanh hun hao n’hanh nuih n’hâm tâm rnglăp bah 49 rnoi nuĭh gŭ rêh ndrel ta nkual neh Dak Lak. Aơ lah nău dơi ƀư ăp rơh 2 năm du tơ̆ gay uănh lah săk rnglăy trong kan nkoch trêng mbơh rblang nău ntrŭnh trong hăn bah Đảng, nău kơl pháp luật bah Neh dak tât ăp rơh kơn nuĭh ƀon lan; nta an tâm nđŭr, n’hao săk rnglăy nău kan nkoch trêng ta ntŭk.