Nkhêp geh nkah ndray 134 năm nar deh Wa Hồ dêh rŏng, nar 17/5, kônh wa nuĭh Gié- Triêng ƀon Đăk Răng, xã n’har bri Đăk Dục, nkuâl Ngọc Hồi, n’gor Kon Tum rhơn pơk ngăn rơh wơt năch pâl nđaih. Rdâk njêng ntŭk pâl nđaih nsum mpôl, ƀon lan Đăk Răng, xã n’har bri Đăk Dục, nkuâl Ngọc Hồi, n’gor Kon Tum hŏ ntik n’hao âk ndơ geh ƀư uĕh êng săk  tơm bah nuĭh Gié- Triêng.

Aƀaơ ndrel đah rmôt chĭng gong, múa xoang, kônh wa hôm  mât nău kan n’gon ndrănh yăng, cheh tanh bok ao, lôk ƀư ăp ndơ uh goh; ƀư ăp ndơ dŏng kan mir ba, gŭ rêh, ndơ nkah ndray; mât ndray jay  rot di kơt nău way ơm kăl e; mât ndray ăp  lễ hội tĭng du bông nuĭh n’hanh khay ƀư mir ba…đah nău nsrôih ntik n’hao văn hoá way ơm, bri dak uĕh măt uănh gay hun hao pâl nđaih, đah nău ntop kơl bah n’gâng kan  ta ntŭk, ƀon Đăk Răng hŏ tŏng ăp rnoh geh n’hanh dơi UBND n’gor Kon Tum kơp dơn lah ƀon pâl nđaih nsum mpôl.