Nklang jâng gŭ jay cộng đồng buôn Ky, nkual ƀon têh Buôn Ma Thuột, n’gor Dak Lak, nteh nuĭh kuăl brah lăp ndrel đah nteh chĭng. Nău kuăl brah geh kơt aơ: Ơi ăp brah yang... ơi u che yău ye....hăn sĭt ta aơ uănh buôn Kỳ ƀư brah kuăl mih kơl an mih lăng prăng uĕh, mir ba uĕh jêng, bôh ba săk play lăi mbôn. Kơl an kônh wa geh âk săk soan, nău rêh đăp mpăn, mô geh nuh srê tât đah kon nuĭh, tơm tăm n’hanh mpa rong...”.

Lôch nău kuăl brah, nuĭh kuăl brah ƀư nsơr poăch mpa jă brah đah ndơ geh du mlâm djăr nkuăng n’hanh yăng ndrănh. Jêh nĕ ƀư jik koaih mir, tuch ba, nchron pănh mpa bri, ntru ăp ntil mpa phah mir ba. N’glêh dŭt lah ƀư rhsach dak ƀư mih, njuăl mpŏng ŭch bah nuĭh bon lan dăn kâp an mih gay tơm tăm uĕh jêng, mô geh tu ndrŭng, sĭm phah.

Bu ranh ƀon Y Bang Byă (way kuăl lah aê Y Rắk), ta buôn Kỳ an gĭt, aơ lah trong ƀư gŭ âm nsum mpôl dơi nuĭh Ê đê mât ndrăy bah âk năm aơ.

Tâm du năm du tơ̆ kônh wa an mâp măt, tâm nđŭr mpeh nău rêh, tuch tăm n’hanh lŏ mir. Tâm ăp ƀon, narr nĕ lah nar ƀư gay mâp măt, tâm ôp tâm nti ndrel, nkoch mbơh ăp nău lŏ mir, dăn an mih lăng prăng uĕh năm aơ săk geh n’hanh nsĭt tay geh piăng, geh bok n’gut ao nsoh, lơ nar nău rêh bah nuĭh ƀon lan lơ uĕh lăng lơn.

Jêh ƀư kuăl mih, ăp nuĭh hăn tâm jay cộng đồng gay ƀư brah săk soan an bu ranh ƀon n’hanh ndrel ngêt ndrănh yăng, tâm nđŭr njroh mprơ, tŭr chĭng. Aơ lah nkhêp di an nuĭh Êđê nkah ntĭt kon sau mpeh du nău ƀư brah uĕh, geh âk nău khlay bah rnoi mpôl đêt. Nchrăp an ƀư brah đah ƀon lan tâm ƀon, nô Y Long Niê Siêng, ta buôn Kỳ, nkual ƀon têh Buôn Ma Thuột nkoch:

Đah đoàn viên druh ndăm mpôl hên dŭt geh nkô̆. Bôk năp, lah mât ndrăy, mât văn hóa bah nuĭh Ê đê ta ntŭk. Tal 2, lah mpôl hên dơi nti mpeh trong kan nchrăp kơt ăp ndơ nchrăp uĕh gay m’hâm ƀư an kuăl brah mih dơi đăp mpăn, gay dơi mât tay, dơi ndrăy an ăp rơh kơn bah kơi.

Ƀư brah kuăl mih, nuĭh Êđê kuăl lah “Kăm mah” lah du nău ƀư way ơm dơi ƀư ăp năm, jêh rnôk kônh wa ƀư kloh mir, knơm kâp trŭnh mih gay ntơm tuch tăm. Ƀư brah way dơi ƀư tâm khay 3 mô lah tâm khay 4, rnôk trôk nar tâm rnôk duh phang hô. Nuĭh Ê dê way lah, jêh “Kăm mah” ri kônh wa mư dơi an tuch tăm ăp ntil tuh mbô bôh ba gay dơi mih lăng prăng uĕh, mô geh mpa bri, sĭm och  phah.

Tĭng wa Y Ơm Ênuôl (ama H’Lim), Bí thư Chi bộ buôn Kỳ, ta năp ăp nău rgâl bah nkual ƀon têh, nău rêh tuch tăm bah ƀon lan lĕ geh âk nău rgâl nkre âk nău rgâl tâm ăp nău ƀư brah n’hanh tĭng tâm lŏ mir. Yơn lah, ăp năm dăch aơ, đah nău ntop kơl bah ngih dak n’hanh nău kan văn hóa, du đêt nău ƀư way ơm dơi rdâk ƀư tay n’hanh mât tâm ƀon lan.

Đah nău ntĭm, rđău bah nkual ƀon têh, bah n’gor gay mât rƀăy nău văn hóa bah rnoi nơm, jêng mpôl hên hôm e nsrôih ndâk ƀư tay tĭng nău way kăl e, geh nkô̆ nău gay kon sau gĭt n’hanh mbra mât tay.

Ndrel đah ƀư brah kuăl mih, ta buôn Kỳ aƀaơ hôm e dơi mât ndrâm dak n’hanh ƀư brah ndrâm dak. Rmôt chĭng, rmôt njroh bah ƀon hôm e dơi mât tiăr nti n’hanh hăn njroh tŭr chĭng tâm âk bôk nău ƀư tâm nđŭr văn hóa bah n’gor, nkual ƀon têh. Aơ lah trong an nuĭh ƀon lan, ngăn lah rơh druh ndăm tâm ƀon gĭt tât, wât lơn n’hanh ndrel ty mât ndrăy ăp nău uĕh tâm văn hóa way ơm bah rnoi nuĭh nơm.