Nuĭh ƀư báo Lê Quốc Minh, Ủy viên Trung ương Đảng, Kruanh Hội nhà báo Việt Nam, Groi kruanh Ban Tuyên giáo Trung ương, Tổng Biên tập Báo Nhân dân an gĭt: Rlău ăp rơh ƀư an giải báo chí lam dak, nău rhơn ngăn nĕ lah tâm ƀah đah báo chí Trung ương n’hanh n’gor lĕ tâm êp. Geh ăp giải A sĭt đah báo chí n’gor mô lah ngih pah kan báo chí jêt. Uĕh di ăp nău nchih râng tâm rlong bơi tâm ban lơn. Nău uĕh ang tay lah ngih pah kan báo chí n’gor aƀaơ ntuh kơl tâm báo điện tử du trong uĕh lơn. Ăp radio ntuh ngơi, ntuh rup n’gor dơi ƀư ăp phóng sự uĕh di âk. Mpeh nău ƀư an Giải báo chí lam dak rơh tal 18, Nuĭh ƀư Báo Lê Quốc Minh nkoch:

Năm aơ Ƀư jao an giải Báo chí lam dak dơi ƀư dŭt têh, tĭng trong ƀư êng. Mpôl hên sŏk nuĭh geh giải ƀư ta n’gul. Nuĭh hăn dơn giải saơ lap n’hanh ntô̆ n’hao đah giải ma khân pơng dơi geh. N’ăp nuĭh gŭ uănh saơ ntô̆ n’hao đŏng đah ăp ndơ geh bah băl nơm lĕ dơi geh. Trong ƀư mhe kơt nê mbra nkoch rêng nău ŭch an ăp nuĭh mô hŏ geh giải n’hanh n’hao ăp nuĭh lĕ geh giải gay he saơ uĕh blău Giải Báo chí lam dak tâm di lah giải báo chí khlay ngăn bah neh dak Việt Nam.

Tĭng nuĭh ƀư báo Lê Quốc Minh, Kruanh Hội Nhà báo Việt Nam, báo chí mhe đă ăp nău rgâl mhe n’hanh mĭn ƀư mhe na nao. Mpŏng ăp ngih pah kan báo chí mbra ƀư tĭng tâm rnôk rgâl mrô lôch uĕh, rgâl mĭn ƀư mhe na nao, geh trong ƀư báo di ngăn n’hanh lơn lah an nar lơ uănh khlay nău uĕh di an mât jâng nuĭh răk uănh, kuăl jă ăp răk uănh mhe, mât nău tơm hăn lor tâm nău pă an nu nău mhe pă an nău nău gĭt blău an kon nuĭh. Năm bah năp, bôl mâp âk jêr jŏt, ntŭl rlong, yơn Hội lôch uĕh mro ăp nkô̆ nău kan n’gluh an n’hanh geh âk nău uĕh ang. Bah nĕ rgop lôch jêh nău kan chính trị bah Hội Nhà báo Việt Nam năm bah năp.

Bah bôk năm kan tât aƀaơ, Đảng đoàn, Ban Thường vụ, Ban Chấp hành n’hanh rnâng kan Hội đoàn kết, tâm ban ŭch tâm trong kan ntĭm rđău, ƀĭt joet ăp gưl hội, nău ƀư bah ăp gưl Hội tâm lam dak geh âk nău uĕh, rgâl uĕh; ngăch gĭt nău ŭch rŏng, mpŏng kâp bah nuĭh bao hội viên, rgum mkra kơl đăp mpăn nău mĭn, tâm rnglăp tâm ban ŭch.

Hội Nhà bao Việt Nam aƀaơ geh rlău 25.000 hội viên dôl rgum rƀŭn ta 307 đơn vị gưl Hội. Bah bôk năm tât aƀaơ, Ntŭk ntĭm nti nghiệp vụ báo chí bah Hội lĕ ƀư geh rlău 256 jrô ntĭm nti an bơi 9.000 nuĭh hội viên nuĭh ƀư báo lam dak. Nkre an gĭt, ăp gưl Hội bah trung ương tât n’gor lĕ ndâk njêng rlău 250 Hội đồng rmal nău tih nău rêh pah kan bah nuĭh ƀư báo Việt Nam n’hanh an dŏng nar lơ rjăp, lĕ rmal ngăch n’hanh rjăp du đêt nău tih pháp luật n’hanh nău rêh pah kan.

Mhe aơ, ta nar pah kan đah Hội Nhà báo Việt Nam, Kruanh Ban Tuyên giáo Trung ương Nguyễn Trọng Nghĩa nkoch kloh; năm tât, Đảng đoàn Hội Nhà báo Việt Nam an uănh tay trong kan ntĭm nti chính trị, nău mĭn gay nuĭh ƀư báo wât jru ƀư báo lah ƀư cách mạng, nuĭh ƀư báo lah tahen hăn lor ta ăp măt trận nău mĭn-văn hóa bah Đảng; gay mât uĕh nău ƀư tơm, nău kan, ƀư săk rnglăy nău kan chính trị dơi Đảng, Ngih dak n’hanh nuĭh ƀon lan nsing nơm, jao an.

Hội Nhà báo Việt Nam ŭch lah ntŭk nsing nơm, lah ntŭk nsing mpeh nău way kan, nău kan gay ăp ngih pah kan báo chí nsrôih tay, joi rgâl mhe nơm, ngăn ngên jêng trong mbơh nu nău di na nê̆, ngăch, tĭng nău ngăn neh dak, n’hâm nsôr bah nău rêh, bah nĕ ƀư tĭng trong nchrŏng nău mĭn, jêng tâm ban tâm nău rêh, nâp nâl ƀư tơm lah nu nău mhe tơm khlay, dơi nsing nơm đah nuĭh ƀon lan. Ăp nău nchih báo chí an lah du nău nchih geh nău văn hóa, ntĭm nti. Du hê ƀư báo an ngăn ngên lah du hê tahen ta ntŭk gŭ nău mĭn đah “măt ang, nuih n’hâm kloh, mâng nchih hơr”, ngăch tâm nău kan, janh njrăng n’gang tay ăp nău tih, nâp nâl săk nơm bah năp ăp nău nsŭk nsôr ƀa ƀơ...

Nkhêp di Nkah gĭt 99 năm Nar Báo chí cách mạng Việt Nam, Kruanh Ban Tuyên giáo Trung ương Nguyễn Trọng Nghĩa mbah rhơn an Hội Nhà báo  Việt Nam nar lơ tâm di lah rmôt kan chính trị-rêh jêng-nu nău kan khlay bah neh dak, lah “Jay nsum” tâm rgum, tâm rnglăp têh hvi ăp nuĭh ƀư báo lam dak.