Bôk nau kan ntuh kơl ndâk trong hăn ngăch Bắc-Nam mpeh ba dâng Gia Nghĩa n’gor Dak Nông-Chơn Thành n’gor Bình Phước lah trong khlay, tâm nthoi nkuăl Tây Nguyên ndrel Đông Nam Bộ, nkuăl Tây Nam Bộ ndrel nkuăl ƀon têh Hồ Chí Minh. Đah rnoh jong 128 km, ntuh kơl rơh 1 geh 4 bôk ndeh hăn dơi. Rnoh ntuh kơl dĭng lĕ lah 25.540 rmen. Ăp ntoh măt đă Chính phủ ƀư ntrŭnh Bôk nau kan ân đăp mpăn nau ngăch, nâp, săk tam ntuh kơl tĭng di ma nau ntrŭnh bah pháp luật. Êp nê, nau kan ntuh kơl tĭng trong ƀư ân geh kơp rjăp nau rgum ăp tơm ntuh kơl, ntŭk ân manh prăk râng nau ntuh kơl. Wa Trình Lam Sinh, Rmôt kan bah n’gor An Giang, lah rjăp:

 ‘Rnôk kuăl jă ntuh kơl râng nau kan aơ tĭng trong ƀư nsum, êng, nơm ân geh mĭn tât nau kan ân tâm di ma nau geh dơi, kŏ kơt lah mbơh nkoch ăp nau tât khuch ân tâm di bah bar ding, tâm nê Ngih dak ân pơk trong nơih ân tơm ntuh kơl, geh nau kan rgum prăk ân săk tam. Nau aơ khlay ngăn yor nau kan mô tŏng ueh gay ma rgum ăp tơm ntuh kơl ri rnôk nơm ntrơn nau ntuh kơl jêng nau kan ntuh kơl nsum ri lŏ ƀư jêng nau mbrơi, khuch ngăn tât tơm prăk Ngih dak, nau rgum tơm prăk bah ntŭk rêh jêng gay ma ndâk ăp ntŭk ntu gung trong hăn”.

Đah ăp nau sŏk dŏng ndơ geh gay ma ƀư ndơ ndâk trong hăn, kơl an nau kan, wa Nguyễn Trường Giang, rmôt kan bah n’gor Dak Nông đă Quốc hội uănh gay geh dŏng du đê̆ nau kan geh tơm:

 ‘Đah ma ntŭk ê geh pă săm ƀŭt gay geh dơi leo sŏk dŏng ndoh ndơ, săm ƀŭt ân sŏk dŏng nê ei tơm ntuh kơl nau kan geh săch gay ma sŏk dŏng. Tơm ntuh kơl ƀư nau kan ân geh ndŏ săm ƀŭt đăng kí nau nchrăp nau kan gay ma sŏk dŏng ăp nô̆ nau mât ntŭk ntu ndrel jao ân UBND n’gor Bình Phước ndrel UBND n’gor Dak Nông geh nau kan kơp năl rnoh nau nchrăp dŏng nau kan gay ma mât ntŭk ntu gŭ âm geh nau dơi kap ma ndơn nau kan sŏk dŏng ndơ, ndơ dŏng gay ma ndâk nkra tâm rnoh ân dơi geh ƀư”.

 Đah tơm prăk Trung ương rlau 10 rbăn rmen, ăp ntoh măt đă Chính phủ ân ƀư kloh nau kan pă tơm prăk gay ƀư Bôk nau kan tâm năm 2026. Đah tơm prăk n’gor geh rnklăp rlau 2000 rmen, đă ăp nkuăl ân ơm ndơn nau kan bah năp Chính phủ, Chính phủ ndơn nau kan bah năp Quốc hội mpeh nau pă dăp tơm prăk bah n’gor ân nau kan geh ƀư ân đăp mpăn nau dơi. Đah tơm prăk ntuh kơl tă bah ăp tơm nklăp 12 rbăn rmen, geh 50% rnoh ntuh kơl bah nau kan, đă Chính phủ ân tâm ban đah tơm ntuh kơl, der nau rgâl bah bôk nau kan.

 Nkoch mbơh nau tâm rơh rƀŭn, Kruanh n’gâng kan Gung trong nchuăn rdeng Nguyễn Văn Thắng lah rjăp, nau kan ntrŭnh ƀư, ăp n’gor kŏ lah rjăp mra geh pă tơm prăk tâm ban, tŏng tơm prăk gay ƀư nau kan ân tâm di ma nau ngăch jêh tâm dŭt năm 2026:

 ‘Nau khlay bah nau kan aơ lah nơih mpeh nau ndơ leo sŏk dŏng kan. Rnôk aơ tĭng nau mbơh nchră bah rnoh geh bah 2 n’gor ri 2 n’gor jŏ pă tŏng ăp nau kan ntŭk geh bah tơm ntŭk nơm dơi geh sŏk. Knŭng geh nau kan rnôk aơ lah nơm geh ntrong kan ma Quốc hội dôl ma nchrăp nau ntrŭnh ƀư ri kŏ geh nau nơih đŏng, geh nau kan ueh geh tât nau kan ntrơn ntŭk gay ƀư nau kan, săk tơm ntuh kơl gay ma ndâk ăp ntŭk ân ntrơn gŭ mhe. Aơ lah ăp nau ueh bah nau kan ân geh ngăch. Hôm nau kan geh tât ntŭk pă ăp tơm ndơ dŏng gay ma ndâk ƀư ri ăp nau kan aơ kŏ mra geh nau nơih đŏng”.

Ntoh măt Quốc hội ndrel cử tri rnơm lah, nau kan ntuh kơl ndâk nkra trong hăn ngăch Gia Nghĩa n’gor Dak Nông-Chơn Thành n’gor Bình Phước mra ăp nhoat ƀư jêh ntrong hăn ngăch, pơk luh ntŭk ueh mhe ân nau hun hao tâm nkuăl Tây Nguyên./.