Rơh rƀŭn nchră WEF Đại Liên 2024 geh nău tât râng kan bâh 1.600 đại biểu. Thủ tướng Chính Phủ Phạm Minh Chính lah ngoăy tâm rnoh đê̆ nuĭh dâk bôk năp Chính phủ geh WEF n’hanh dak tơm jay Trung Quốc jă tât râng rơh rƀŭn nchră tâm 2 năm mbro.

Nău nĕ mpơl WEF n’hanh Trung Quốc dŭt uănh khlăy nău kan, nău knơm n’hanh tâm rgop bâh Việt Nam an hun hao wăng sa lam ntur neh tâm ban kơt nău mpŏng hun hao bâh Việt Nam đah n’gâng kan wăng sa tâm let năp tay. Ta rơh rƀŭn nchră, Thủ tướng Chính phủ nchrăp mbra geh bôk nău pah kan âk, mbro, nđâp ma lĕ bar ding n’hanh âk ding. Ngăn lah ta năm aơ, rơh bôk năp Thủ tướng Chính phủ mbra geh du nău ntoh ngơi ta ăp rơh tâm nchră ta rơh rƀŭn nchră, leo ăp rơh tâm nchră ngơi, tâm ngơi đah âk ntŭk rêh jêng doanh nghiệp an êng đah Việt Nam.