Ƀư tâm 2 nar (23-24/9), Nar rgum rdâk njêng nău kan rgâl mhe mĭn ƀư mhe n’gor Dak Lak năm 2024 (Techfest) Dak Lak 2024) geh âk nău ƀư kơt: mpla nsơ nkoch mbơh ăp nău nchrăp ƀư, ndơ rdâk njêng nău kan, OCOP, công nghiệp thôn ƀon, rhŏ an pâl nđaih; du đêt rgum nchră mpeh rdâk njêng nău rgâl mhe mĭn ƀư mhe, rdâk njêng nău kan uĕh nđĭr, trong mkra ntrôl rdâk njêng nău kan tâm ăp nău kan, ăp ntil nău, ăp rmôt nuĭh... Aơ lah nău dơi ƀư ăp năm, gay nta an tâm mâp tâm nđŭr ta ntŭk nsum mpôl rdâk njêng nău kan, boăt nthoi ntuh kơl, joi nuĭh kan ndrel, pơk hvi ntŭk tăch.

Tâm trôm nar rgum nchră rdâk njêng nău kan rgâl mhe mĭn ƀư mhe n’gor Dak Lak năm 2024, N’gâng kan Công thương Dak Lak ƀư Rƀŭn nchră boăt nthoi tâm nđŭr ndơ, tăch ndơ năm 2024. Rƀŭn nchră rƀŏng tât nta an soan rêng hvi n’hanh hun hao nuih n’hâm rdâk njêng nău kan, nuih n’hâm doanh nhân tâm ăp rơh kơn nuĭh ƀon lan đah nău ƀư rdâk njêng nău kan rgâl mhe, boăt nthoi ăp nuĭh tơm, ăp nuĭh khoa học, nuĭh mât uănh, wa Đường Văn Quân, Giám đốc Công ty cổ phần dinh dưỡng Cao Nguyên nkoch:

Tâm trôm bôk nău kan aơ gâp ŭch mbơh đah ntŭk kan mhe rdâk njêng mô lah ntơm geh ndơ ndơ̆ ntŭk tăch khân pơng uănh saơ ăp gưl ndơ̆ ndơ luh ntŭk tăch m’hâm ƀư. Bah trong nău njêng, ƀư dŭng tâl ndơ, ăp sam ƀŭt geh tât pháp lý mpeh ndơ rnôk khân pơng râng ntŭk tăch. Gâp geh du nsum mpôl gay ntop kơl ntĭm nti an dơm.

Rơh aơ, ta nkual ƀon têh Buôn Ma Thuột lĕ ƀư rƀŭn nchră ntrôl trong rdâk njêng nău kan rgâl mhe n’gor Dak Lak. Râng rgum nchră, PGS.TS. Lê Đức Niêm, Groi Hiiêụ trưởng Ngih sam ƀŭt Đại học Tây Nguyên an lah, trong rdâk njêng nău kan rgâl mhe ta Dak Lak dôl ta gưl 2, lah gưl n’gâng kan tơm, mô hŏ jêh. Yor nê, an lôch jêh ăp nkô̆ nău, ndâk njêng ăp nkô̆ nău mpeh tơm prăk, ntĭm nti...

Bôk năp lah an tŏng ăp, geh tŏng ăp nuĭh, ngih sam ƀŭt đại học, doanh nghiệp, doanh nghiệp ntuh kơl, ăp ngih pah kan ban ngành, lơn lah, geh nău nchrŏng bah n’gor, tâm nĕ geh ăp nuĭh dŭt n’hâm an ntrôl trong rdâk njêng nău kan hun hao. Tal 2 lah hăn jru, ăp nău ƀư đêt nuih n’hâm lơn, hăn lăp jru ngăn ngên lơn, ntop kơl ăp doanh nghiệp hun hao. Lah hun hao trong rdâk njêng nău kan uĕh ri doanh nghiệp mbra geh êng trong ƀư nĕ.

Tâm ăp nar rgum rdâk njêng nău kan rgâl mhe n’gor Dak Lak năm 2024, ăp ntŭk kan lĕ mpla nsơ, nkoch mbơh bơi 150 ndrơng ndơ rdâk njêng nău kan mĭn ƀư mhe, ndơ OCOP, công nghiệp thôn ƀon, ndơ rhŏ pâl nđaih bah ăp ntŭk kan, doanh nghiệp tâm n’gor.

Wa Nguyễn Tuấn Hà, Groi Kruanh Rnâng kan UBND n’gor Dak Lak uănh lah, lôch uĕh bah nar rgum lah ntrŭt nsôr hô nuih n’hâm rdâk njên nău kan tâm ăp rơh kơn nuĭh ƀon lan, kon hŏk, sinh viên. Ntrôl ăp nău mĭn njêng rgâl mhe, ndâk njêng trong rdâk njêng nău kan rgâl mhe n’gor nar lơ nâp dăng, ngăn ngên n’hanh săk rnglăy.

Ăp rgum nchră lĕ hăn jru tâm ăp bôk nău, kơt rgum nchră geh tât rgâl ƀư mhe ri ngih sam ƀŭt đại học Tây Nguyên lĕ uănh khlay rgâl mhe tâm kon hŏk, sinh viên hôm N’gâng kan Kế hoạch n’hanh Đầu tư ri rgâl mhe tâm doanh nghiệp, hợp tác xã. Rnôk hăn lăp jru kơt nĕ săk rnglăy nsĭt tay dŭt uĕh. Ăp ndơ bah ăp băl ntơm tăch rgâl nar lơ hăn lăp jru, rup gui nar lơ uĕh n’hanh hao nău khlay, rêng hvi âk lơn  tât ăp rơh kơn nuĭh ƀon lan.

Dơi lah, ăp nău ƀư ntop kơl rdâk njêng nău kan ta n’gor lĕ dơi geh uĕh, rgop ndâk njêng trong rdâk njêng nău kan Dak Lak hun hao tĭng trong jru, rêng hvi nuih n’hâm rdâk njêng nău kan n’gŭr răm tâm ăp rơh kơn nuĭh ƀon lan.