“Tâm rnglăp-hăn lor-mpŏng ŭch-hun hao” lah bôk nău bah Đại hội đại biểu Hội liên hiệp druh ndăm Việt Nam n’gor Dak Nông rơh tal 5, năm kan 2024-2029 ƀư tâm 2 nar (25-26/9). Râng đại hội geh 178 đại biểu lah cán bộ, hội viên, druh ndăm ntoh lư ntoh măt an rlău 151.000 druh ndăm lam n’gor Dak Nông.

Năm kan 2024-2029, đah nău ngơi “Druh ndăm Dak Nông tâm rnglăp-hăn lor-mpŏng ŭch-hun hao”, Hội LHTN Việt Nam n’gor Dak Nông mbơh ƀư tay âk trong ndâk njêng rơh druh ndăm geh nău mĭn cách mạng, janh dăng, ndrŏng nău rŏng dak, n’hao lĕ đah nău kan đah ƀon tơm, neh dak, kon nuĭh. Mpôl druh ndăm Dak Nông nta ntŭk ntô, nta an nti ren, pah kan, pâl nsong an druh ndăm hun hao uĕh, lĕ rngôch, hăn lor, kơl kan, mĭn ƀư mhe mât njrăng Neh dak n’hanh ndâk njêng hun hao wăng sa rêh jêng.