Tâm rnôk hăn khâl gưl ngih dak tât Cuba, Tổng Bí thư, Kruanh dak Tô Lâm hŏ ôp srĭng nău đah Ủy viên Bộ Chính trị, Thủ tướng Chính phủ dak Cộng hòa Cuba Manuel Marrero Cruz. Thủ tướng Manuel Marrero Cruz mpơl nău rhơn dơi wơt Tổng Bí thư, Kruanh dak Tô Lâm; lah rjăp hăn khâl bah Tổng Bí thư, Kruanh dak lah nău kan geh nkô̆ khlay lịch sử tâm boh bar dak.

Tổng Bí thư, Kruanh dak Tô Lâm mpơl nău uănh khlay n’hanh rnê âk ăp nău dơi ma ƀon lan Cu-ba oh nô hŏ dơi geh kalơ trong hao tât chủ nghĩa xã hội tâm rnôk hôm mâp âk jêr jŏt. Tổng Bí thư, Kruanh dak Tô Lâm n’hanh Thủ tướng Manuel Marrero Cruz hŏ tâm ôp mpeh nô nău tâm boh đah bar dak mhe aơ. Bar ding hŏ tâm ôp jru ăp trong nkra gay n’hao nău dơi tam tâm boh Việt Nam – Cuba kalơ ăp trong kan; tâm ban ŭch ntrôl dăng n’hanh n’hao nău dơi tam tâm boh wăng sa, lah rjăp bar ding ân uănh khlay tay, tĭng ƀư jăp ăp trong nchrăp tâm boh tuch tăm, gŭ mĭn trong rƀŏng tâm boh mhe nsĭt geh nău dơi, jŏ jong.