Trong n’gor mbrô 721 an ndeh hăn nsong rnôk UBND nkuăl Đạ tẻh tâm rgop đah ntŭk kan mât uănh ntung trong n’gor Lâm Đồng ƀư an tay trong n’hong dak ta ntŭk rluh neh n’hanh ƀư tay du trong der. Tât kêng măng lơ 26/9, ntŭk aơ lĕ geh ƀư lôch đah lŭ choih, mât đăp mpăn ăp bôk ndeh klư hăn nsong đăp mpăn. trong n’gor mbrô 721 lah trong hăn tơm nthoi let 3 nkuăl mpeh ba dâng bâh Lâm Đồng geh Đạ Huoai, Đạ Tẻh n’hanh Cát Tiên. Ta năp nĕ, ta  nkuăl Đạ Tẻh n’hanh Cát Tiên geh mih têh jŏ nar, dak buk bâh tu dak let jâng dak geh ntŭk hoch let trong n’gor mbrô 721, ƀư rlâm chor nching rkăng trong, rluh rlâm ta nklang trong, ƀư ăp ndeh klư hăn nsong mô dơi hăn.