Kêng măng lơ 26/9 tĭng mông ta ntŭk, rơh vơt ngăn Tổng Bí thư, Kruanh dak Tô Lâm n’hanh i ur ndrel đah mpôl đại biểu gâl têh Việt Nam tât khâl gâl ngih dak tât dak cộng hòa Cuba lĕ geh ƀư ta Cung čách mạng ta thủ đô La Habana. Lôch tă geh rơh vơt ngăn, Tổng Bí thứ, kruanh dak Tô Lâm ndrel đah Bí thư tal 1, kruanh dak Cuba Miguel Diaz-Canel Bermudez leo mpôl đại biểu gâl têh 2 dak ƀư tâm nchră.

Bar hê nuĭh leo kan lah na nê̆ nău tâm ban đah Việt Nam n’hanh Cuba mpeh lịch sử n’hanh mpeh nău rêh, mpeh trong hăn tĭng chủ nghĩa xã hội n’hanh nău tâm boh tâm rnglăp nâp ueh lĕ geh kruanh Hồ Chí Minh n’hanh Tổng tư lệnh Fidel Castro ndâk njêng, tiăr nti bâh âk năm khay. Bar hê nuĭh leo kan nsrôih hun hao tay têh dăng nău tâm boh kan tâm rnglăp way ơm, ngăn lah tâm rnglăp tâm kơl lĕ rngôch đah Việt Nam-Cuba hao du njoat mhe lĕ rngôch, na nê̆, săk rnglăy n’hanh nâp nâl lơn. Bar hê nuĭh leo kan tâm ban ŭch tâm rgop ƀư du rơh tâm nchră Lý luận tal 6 đah 2 Đảng n’hanh rơh tâm nchră khoa học lam ntur neh tal 2 mpeh nău mpŏng kan cách mạng bâh Kruanh Hồ Chí Minh n’hanh nuĭh leo kan Cách mạng Cuba Fidel Castro n’hanh ăp nău pah kan tâm kơl êng tâm let năp tay. Ta rơh tâm nchră, Tổng Bí thư, kruanh dak Tô Lâm mbơh tơih đah Bí thư tal 1, kruanh dak Miguel Díaz-Canel Bermúdez mpeh nău Đảng, ngih dak n’hanh ƀon lan Việt Nam pă an ƀon lan Cuba oh nô 10 rbăn tấn phe, Tổng Liên đoàn lao động Việt Nam pă an ntŭk kan kơl an nuĭh pah kan Cuba n’hanh du đê̆ ntŭk Việt Nam lĕ pă an ƀon lan Cuba du đê̆ ndơ pă an.

Kêng măng lơ 26/9 tĭng mông ta ntŭk, Tổng Bí thư, Kruanh dak Tô Lâm lĕ tâm nchră đah kruanh Quốc hội n’gâng kan ƀon lan Cuba Esteban Lazo Hérnandez