Kêng măng nar 15/11, Thủ tướng Chính phủ Phạm Minh Chính mâp măt nai ntĭm nti ntoh lư nkhêp nkah ndray Nar nai ntĭm nti Việt Nam 20-11. Tâm mông nar khlay, răm mƀak, Thủ tướng Phạm Minh Chính rhơn wơt 60 nai ntĭm nti ntoh lư, ăp nuĭh hŏ geh âk nău rgop blău an n’gâng kan ntĭm nti bah neh dak, ntơh măt an 1,6 rkeh nai ntĭm nti lam dak, Thủ tướng lah rjăp, rƀŏng tât rơh hun hao mhe, ntĭm nti lah trong kan khlay dâk bôk  bah neh dak; n’gâng kan ntĭm nti dak he ân rgâl mhe lĕ n’hâm suan bôk tơm n’hanh lam lĕ rngôch lơn, ân rdâk njêng săk blău n’hanh têh mhe.

Gay tĭng ƀư jăp ăp nău dơn kan dŭt n’hâm  jâk r’ah dja, Thủ tướng dăn đă ăp bộ, ăp n’gâng kan, ăp n’gor mât uănh khlay tay an n’gâng kan ntĭm nti; rgum n’hanh dŏng geh nău  tam ăp tơm ndơ gay ntuh kơl rvăt năp drăp ndơ dŏng an nhih nti; rdâk njêng n’hanh hun hao tay văn hóa hăn nti. N’hao săk blău rmôt nai ntĭm nti, cán bộ ƀư pah kan ntĭm nti. Thủ tướng dăn đă, ăp nai ntĭm nti ân lah du hê nuĭh leo lor trong chrat ang mpeh tiăr nti nuih n’hâm uĕh lŏng- tiăr nti nău gĭt blău, rŏng kon nuĭh- rŏng nău kan, nsum ti rdâk njêng rơh kơn ndơn tay bah kơi bah neh dak hun hao lam lĕ rngôch./.