Ta n’gor Kon Tum, Mpôl pah kan bah Ban Tuyên giáo Trung ương hŏ hăn uănh nô nău tĭng ƀư nău ntrŭnh bah Ban Bí thư Trung ương Đảng mpeh ntrôl dăng pah kan bảo hiểm y tế tâm nô nău mhe. Lôch 15 năm tĭng ƀư nău ntrŭnh bah Ban Bí thư Trung ương Đảng mpeh ntrôl dăng pah kan bảo hiểm y tế tâm nô nău mhe, tât aƀaơ rnoh âk nkrum bảo hiểm y tế bah n’gor Kon Tum geh rlău 93%.

Tâm nê, rnoh nuĭh râng bảo hiểm y tế rnăk wâl âk bơi 16%; rlău 85% rnoh nuĭh tâm n’gor dơi njêng, mât dŏng hồ sơ n’hâm suan điện tử ta trạm y tế n’hanh 100% trạm y tế xã tĭng ƀư but, săm ji ma bảo hiểm y tế. Lah ta rơh hăn ôp uănh, wa Vũ Thanh Mai, Groi Kruanh Ban Tuyên giáo Trung ương, an lah, bah meng ntop kơl bah trung ương, gay mât nâp n’hanh n’hao tay rnoh âk nkrum bảo hiểm y tế, Kon Tum ân nkoch trêng âk mpeh trong kơl n’hanh nău geh bah bảo hiểm y tế; hun hao âk ntŭk kan dak si tâm dâng, lơn lah rgum n’hao săk tam but săm ji, nta trong dơh an nuĭh ji dơi tât, dŏng ăp ndơ rhŏ dŏng dak si.